উত্তৰ প্ৰদেশৰ (Uttar pradesh) এসময়ৰ মাফিয়াৰ পৰা ৰাজনীতিক হোৱা তথা প্ৰাক্তন সাংসদ আতিক আহমেদ ( Atiq Ahmed) আৰু তেওঁৰ ভাতৃক আততায়ীয়ে শূন্য দূৰত্বৰ পৰা গুলীয়াই হত্যা কৰে । শনিবাৰে দুয়োকে গুলীয়াই হত্যা কৰা হয় । ঘটনা সন্দৰ্ভত প্ৰয়াগৰাজ আৰক্ষী আয়ুক্ত ৰমিত শৰ্মাই কয়, “আতিক আহমেদ আৰু তেওঁৰ ভাতৃ আশ্ৰফ আহমেদক চিকিৎসাৰ বাবে নিয়া হৈছিল ।
তেনে সময়ত সংবাদ মাধ্যমৰ লোকক বাইট দি থকা অৱস্থাত সংবাদিকৰ বেশত থকা তিনিজন আততায়ীয়ে তেওঁলোকৰ ওপৰত গুলীচালনা কৰে । ঘটনাস্থলীতে দুয়োৰে মৃত্যু হয় । এই ঘটনাত ইতিমধ্যে তিনিজন লোকক গ্ৰেপ্তাৰ কৰা হৈছে । তেওঁলোকৰ সোধা-পোছা চলি আছে । ঘটনাটোত এজন সাংবাদিক আৰু এজন কনিষ্টবল আহত হৈছে ।”
আতিক চিকিৎসালয়ত উপস্থিত হোৱাৰ লগে লগে এজন ব্যক্তিয়ে শূন্য দূৰত্বৰ পৰা তেওঁৰ মূৰত গুলীচালনা কৰে । আতিক লগে লগে বাগৰি পৰে । আন দুজনেও কেমেৰা আৰু মাইক দলিয়াই গুলীবৰ্ষণ আৰম্ভ কৰা বুলি সূত্ৰত উল্লেখ । উল্লেখ্য যে উত্তৰ প্ৰদেশৰ ঝান্সীত সংঘৰ্ষত আতিক আহমেদৰ পুত্ৰ আছাদ নিহত হোৱাৰ কেইদিনমান পিছতে শনিবাৰে প্ৰয়াগৰাজত চিকিৎসাৰ বাবে লৈ যোৱাৰ সময়ত মাফিয়াৰ পৰা ৰাজনীতিবিদ হোৱা আতিক আৰু তেওঁৰ ভাতৃ আশ্ৰফ আহমেদক গুলীয়াই হত্যা কৰা হয় ।
আতিক আহমেদ ২০০৫ চনৰ বিএছপি বিধায়ক ৰাজু পাল হত্যাকাণ্ড আৰু এই বছৰৰ ফেব্ৰুৱাৰীত সংঘটিত উমেশ পাল হত্যাকাণ্ডৰ গোচৰত অভিযুক্ত আছিল । উত্তৰ প্ৰদেশ চৰকাৰে দেওবাৰে সকলো জিলাতে ১৪৪ ধাৰা জাৰি কৰিছে । ঘটনা সন্দৰ্ভত আৰক্ষীয়ে তিনিজনক গ্ৰেপ্তাৰ কৰিছে । আনহাতে, উত্তৰ প্ৰদেশৰ মুখ্যমন্ত্ৰী যোগী আদিত্যনাথে ৰাইজক উৰাবাতৰিৰ প্ৰতি মনোযোগ নিদিবলৈ আহ্বান জনাইছে ।
