নিৰ্বাচনমুখী কৰ্ণাটকত (Karnataka) দুগ্ধ-যুদ্ধ শিখৰত উপনীত হৈছে। ইতিমধ্যে তাত ৰাজনীতিৰ ৰং লাগিছে । এইবাৰ কৰ্ণাটকৰ হোটেল মালিক সন্থাই ঘোষণা কৰে যে তেওঁলোকে কৰ্ণাটকৰ চৰকাৰী গাখীৰ আঁচনি ‘নন্দিনী’ৰ (Nandini) গাখীৰ ব্যৱহাৰ কৰিব। সংগঠনটোৱে আমুল বৰ্জনৰ আহ্বান জনাইছে। উল্লেখ্য, ১০ মেʼত কৰ্ণাটকত বিধানসভা নিৰ্বাচন। তাৰ আগতে কৰ্ণাটকৰ গাখীৰক লৈ কাজিয়াই চৰম সীমাত উপনীত হয়। হঠাৎ নৰেন্দ্ৰ মোডী (Narendra Modi), অমিত শ্বাহৰ (Amit Shah) গুজৰাট হৈ পৰিছে কৰ্ণাটকৰ নিৰ্বাচনত সৰ্ববৃহৎ ইছ্যু।
এই গোলমালৰ সূত্ৰপাতহয় গুজৰাটৰ ৰেডিকেল ডেইৰী কোম্পানীৰ এটা বিজ্ঞাপনত। আমুলে (Amul) কয় যে তেওঁলোকে বাংগালুৰুত অনলাইন গাখীৰ ডেলিভাৰী আৰম্ভ কৰিবলৈ ওলাইছে। কৰ্ণাটকৰ নিজা গাখীৰ সংস্থা ‘কৰ্ণাটক মিল্ক ফেডাৰেচন’-এ (Karnataka Milk Fedaration) (কে এম এফ) ষড়যন্ত্ৰৰ গোন্ধ পায়। কিয়নো তেওঁলোকৰ এটা ব্ৰেণ্ড ‘নন্দিনী’য়ে সমগ্ৰ কৰ্ণাটকতে ব্যাপক ব্যৱসায় কৰি আছে।
গুজৰাটৰ দুগ্ধ কোম্পানী আমুলক একচেটিয়া অধিকাৰ দিবলৈ বিজেপিয়ে নন্দিনীক আমুলৰ লগত মিহলাই দিয়াৰ পৰিকল্পনা কৰা বুলি অভিযোগ উত্থাপন কৰে কংগ্ৰেছ, জেডিএছ-এ। তেতিয়াৰ পৰাই আমুলৰ গাখীৰক লৈ ৰাজ্যত অশান্তিৰ সৃষ্টি হৈছে। কানাড়া ৰাজনীতিবিদৰ এটা অংশই অমিত শ্বাহক এই সন্দৰ্ভত হস্তক্ষেপ কৰিবলৈ আহ্বান জনায়। তেওঁলোকৰ দাবী, শ্বাহে কৰ্ণাটকত গণভোট কৰক। চাওক নন্দিনীক কিমান মানুহে ভোট দিয়ে।
এই দিশত এই ঘটনাক কেন্দ্ৰ কৰি ছচিয়েল মিডিয়াত পোষ্টৰ বান উঠিছে। টুইটাৰত ট্ৰেণ্ড চলিল বয়কট আমুল আৰু গো-বেক আমুল হেজটেগ। কংগ্ৰেছৰ জ্যেষ্ঠ নেতা তথা প্ৰাক্তন মুখ্যমন্ত্ৰী সিদ্দাৰমাইয়াই (Siddaramaiah) ৰাজ্যবাসীক আমুলৰ দ্বাৰা নিৰ্মিত সকলো সামগ্ৰী বৰ্জন কৰিবলৈ আহ্বান জনায়।
তেওঁ কয়, “হিন্দী চপাই দিয়াৰ মাজতে হিন্দী আগ্ৰাসনৰ পিছত এইবাৰ বিজেপি চৰকাৰে দুগ্ধ ব্যৱসায়ৰ কাম গুজৰাট কোম্পানীক গতাই দিব বিচাৰিছে। নন্দিনীয়ে লাখ লাখ লোকক খাদ্য যোগান ধৰে। গুজৰাট কোম্পানীক একচেটিয়া অধিকাৰ দিলে সেই মানুহবোৰে কি কৰিব!”
শেহতীয়াকৈ কৰ্ণাটকত ‘ভাৰতীয় খাদ্য সুৰক্ষা আৰু মানদণ্ড কৰ্তৃপক্ষ’ক (এফ এছ এছ এ আই) তুলাধূনা দিয়া হয়। কাৰণ FSSAI-এ ফৰমান জাৰি কৰিছিল, নন্দিনীৰ দৈৰ পেকেটত ‘দহি’ শব্দটো লিখিব লাগিব৷
ইয়াৰ পিছত বিভিন্ন কানাড়া গোটে হিন্দী জাপি দিয়াৰ অভিযোগ উত্থাপন কৰে। ব্যাপক প্ৰতিবাদৰ সন্মুখত এফ এছ এছ এ আইয়ে এই নিৰ্দেশ প্ৰত্যাহাৰ কৰে। ইয়াৰ পিছত আমুলৰ বিজ্ঞাপনটোৱে এবাৰতে উত্তেজনা আৰু বৃদ্ধি কৰিলে। গাখীৰৰ এই প্ৰতিবাদৰ কি প্ৰভাৱ পৰিব ইভিএমৰ ওপৰত? শাসক, বিৰোধী দুয়ো পক্ষৰ এতিয়া সেয়াই অঙ্ক।
