অৰুণাচল প্ৰদেশ (Arunachal Pradesh)ৰ ১১টা স্থানৰ নাম সলনি কৰাৰ পিছত আমেৰিকা (America)ই চীনৰ বিৰুদ্ধে (Against China) মাত মাতিলে। তেওঁলোকে স্পষ্টকৈ উল্লেখ কৰে যে অৰুণাচল প্ৰদেশ ভাৰতৰ এক অবিচ্ছেদ্য অংগ (integral part of India)। ইয়াৰ উপৰি জো বাইডেনৰ প্ৰশাসনেও জনাইছে যে নাম সলনি কৰি এলেকা দখল কৰাৰ তেওঁলোকৰ প্ৰয়াস ভাল দেখা নাই। বৰঞ্চ আমেৰিকাই চীনৰ এই প্ৰচেষ্টাৰ তীব্ৰ বিৰোধিতা কৰিছে।
মঙলবাৰে হোৱাইট হাউছৰ সংবাদ সচিব কেৰিন জিন পিয়েৰে নিজৰ দৈনিক সংবাদমেলত কয়, “আমেৰিকাই উক্ত অঞ্চলক (অৰুণাচল প্ৰদেশ) দীৰ্ঘদিন ধৰি ভাৰতৰ অবিচ্ছেদ্য অংগ হিচাপে স্বীকৃতি দি আহিছে। উক্ত অঞ্চলৰ নাম সলনি কৰি আধিপত্য বৃদ্ধিৰ প্ৰয়াসক আমি তীব্ৰ গৰিহণা দিছো।” সংবাদ সচিবগৰাকীৰ বিবৃতিত চীনৰ নাম কʼতো উল্লেখ নাই যদিও ছি জিনপিঙৰ দেশকে যে লক্ষ্য কৰি লোৱা হৈছে সেয়া স্পষ্ট হৈ পৰিছে।
উল্লেখ্য, মঙলবাৰে অৰুণাচলৰ ১১টা স্থানৰ নাম সলনি কৰে চীনৰ অসামৰিক পৰিক্ৰমা মন্ত্ৰালয়ে। এই খবৰটো প্ৰথম প্ৰকাশ কৰিছিল দেশখনৰ চৰকাৰী সংবাদ মাধ্যম গ্ল’বেল টাইমছে। চীনে এই অঞ্চলটো দক্ষিণ তিব্বতৰ অংশ বুলি দাবী কৰিছে। গতিকে স্থানীয় ৰাইজৰ উচ্চাৰণৰ সুবিধাৰ বাবে ঠাইবোৰৰ নাম সলনি কৰা হʼল। যি ১১ টা স্থানৰ নাম সলনি কৰা হৈছে তাত পৰ্বতৰ চূড়া, নদী, আনকি আৱাসিক এলেকাও আছে। অৱশ্যে এয়াই প্ৰথম নহয়, ইয়াৰ পূৰ্বে ২০১৭ চনৰ এপ্ৰিল মাহত আৰু ২০২১ চনৰ ডিচেম্বৰ মাহত চীনে একপক্ষীয়ভাৱে অৰুণাচল প্ৰদেশৰ কেইবাটাও স্থানৰ নাম সলনি কৰাৰ অভিযোগ উত্থাপন হৈছিল।
আনহাতে, চীনে এই পদক্ষেপ লোৱাৰ পাছত ভাৰতৰ বৈদেশিক পৰিক্ৰমা মন্ত্ৰালয়ে জনাইছে যে কেৱল নাম সলনি কৰিলেই বাস্তৱ সলনি কৰিব নোৱাৰি। ভাৰতে অৰুণাচল ভাৰতৰ অবিচ্ছেদ্য অংগ হৈ থাকিব বুলি উল্লেখ কৰি চীনৰ এই ‘প্ৰয়াস’ নাকচ কৰে। কিন্তু বৰ্তমানৰ ভূ-ৰাজনৈতিক পৰিস্থিতিত অৰুণাচলৰ সন্দৰ্ভত ভাৰতৰ কাষত আমেৰিকা থিয় দিয়াটো তাৎপৰ্যপূৰ্ণ বুলি বিবেচিত হৈছে। কিছুদিন পূৰ্বেও আমেৰিকাই ভাৰতৰ কাষত থিয় দি চীনক দোষাৰোপ কৰিছিল লাডাখ সীমান্তত স্থিতাৱস্থা ভংগ কৰাৰ কাৰণে।
