অৰুণাচল (Arunachal)ৰ ১১টা স্থান (11 places)ৰ নাম সলনি (Name change) কৰি চীনে (China) লোৱা সিদ্ধান্তক ভাৰতে মানি লʼবলৈ ইচ্ছুক নহয় (India not willing to accept)। এই কথা দিল্লীয়ে স্পষ্ট কৰি দিছে। লগতে জনোৱা হয় যে অৰুণাচল প্ৰদেশ ভাৰতৰ অবিচ্ছেদ্য অংগ আছিল, আছে আৰু থাকিব। গতিকে কোনোবাই নাম সলনি কৰিলে বাস্তৱ কেতিয়াও সলনি নহʼব বুলি দাবী কৰিছে কেন্দ্ৰই।
এনে পৰিপ্ৰেক্ষিতত বৈদেশিক পৰিক্ৰমা মন্ত্ৰালয়ৰ মুখপাত্ৰ অৰিন্দম বাগচিয়ে টুইটযোগে লিখিছে, “আমি চীনৰ প্ৰতিবেদন দেখিছো। চীনে এইটো প্ৰথমবাৰৰ বাবে চেষ্টা কৰা নহয়। আমি এই নামকৰণ মানি লʼবলৈ সন্মত নহয়। অৰুণাচল প্ৰদেশ ভাৰতৰ অবিচ্ছেদ্য অংগ আছিল, আছে আৰু থাকিব। নাম সলনি হ’লেও বাস্তৱ সলনি নহ’ব।”
সোমবাৰে বেইজিঙে জাৰি কৰা এক অধিসূচনাত অৰুণাচল প্ৰদেশৰ ১১ টা স্থানৰ নাম সলনি কৰা হৈছে। আনকি অৰুণাচলৰ ৰাজধানী ইটানগৰৰ সমীপৱৰ্তী এখন চহৰৰো নাম সলনি কৰা হৈছে। চীনৰ সংবাদ মাধ্যম গ্লোবেল টাইমছে চৰকাৰী জাননীৰ উদ্ধৃতি দি কয়, “দেওবাৰে অসামৰিক প্ৰতিৰক্ষা মন্ত্ৰালয়ে আনুষ্ঠানিকভাৱে ১১টা অঞ্চলৰ নাম সলনি কৰে। য’ত দুটা বিশাল ভূমি এলেকা, দুটা আৱাসিক এলেকা, দুখন নদী আৰু পাঁচটা পৰ্বতৰ শৃংগ অন্তৰ্ভুক্ত।”
ইয়াৰ লগে লগে তৃতীয়বাৰৰ বাবে চীনে অৰুণাচলৰ বহু অঞ্চলৰ ‘নাম সলনি’ কৰিবলৈ চেষ্টা কৰিলে। দীৰ্ঘদিন ধৰি চীন চৰকাৰে অৰুণাচল প্ৰদেশৰ এই অংশক ‘জাংনান’ বা ‘তিব্বতৰ দক্ষিণ অংশ’ বুলি দাবী কৰি আহিছে।
২০১৭ আৰু ২০২১ চনত চীনে অৰুণাচল প্ৰদেশৰ কিছু অঞ্চলৰ নাম সলনি কৰি দুখন তালিকা প্ৰকাশ কৰিছিল। ২০১৭ চনত ছটা অঞ্চলৰ নাম সলনি কৰি এই তালিকা প্ৰকাশ কৰা হয়। ২০২১ চনত ১৫টা এলেকাৰ নাম সলনি কৰি এই তালিকা প্ৰকাশ কৰা হয়। কিন্তু দুয়োবাৰেই ভাৰত চৰকাৰে চীনৰ নাম সলনি কৰা চেষ্টাক ব্যৰ্থ কৰে।
ইতিমধ্যে লাডাখৰ প্ৰকৃত নিয়ন্ত্ৰণ ৰেখাৰ সমীপত ভাৰত আৰু চীনৰ মাজত বাৰে বাৰে সংঘৰ্ষ হৈছে। দুয়োখন দেশৰ মাজত বহুবাৰ আলোচনা হৈছে যদিও বিশেষ একো লাভ হোৱা নাই।
এনে পৰিপ্ৰেক্ষিতত চীনে ভাৰতীয় ভূখণ্ডৰ নাম সলনি কৰাৰ প্ৰচেষ্টাই দুয়োখন দেশৰ মাজত নতুন জটিলতাৰ সৃষ্টি কৰিব বুলি ধাৰণা কৰা হৈছে।
