বিগত বৰ্ষত কাজিৰঙা ৰাষ্ট্ৰীয় উদ্যানত (Kaziranga National Park) এটাও এশিঙীয়া গঁড় (Rhino) হত্যা হোৱা নাই বুলি গৌৰৱ কৰাৰ সময়তে শেহতীয়াকৈ অতি নৃশংসভাৱে গঁড় হত্যা কৰি খৰ্গ লৈ উধাও হয় চোৰাং চিকাৰী। আৰক্ষী আৰু বন বিভাগৰ কটকটীয়া নিৰাপত্তাৰ মাজতেই বাগৰি বনাঞ্চলৰ কাঠপৰা বন শিবিৰ এলেকাত এই ঘটনা সংঘটিত হয়।
৪-৫ দিন পূৰ্বে চোৰাং চিকাৰীয়ে এই ঘটনা সংঘটিত কৰে যদিও আজিহে গঁড়টোৰ মৃতদেহ উদ্ধাৰ কৰে বন বিভাগে। ইপিনে, অহা ৬ এপ্ৰিলত কাজিৰঙা ভ্ৰমণৰ বাবে আহিব দেশৰ ৰাষ্ট্ৰপতি দ্ৰৌপদী মুৰ্মু (Draupadi Murmu), ৰাষ্ট্ৰপতি অহাৰ প্ৰাকক্ষণত এই ঘটনা সংঘটিত হোৱাত এতিয়া সকলো হতাশাত ভুগিছে।
উল্লেখ্য যে, খৰ্গবিহীন গঁড়টিৰ মৃতদেহ উদ্ধাৰৰ পিছতেই ঘটনাস্থলীত বন বিভাগ তথা আৰক্ষীৰ শীৰ্ষ বিষয়া সকল উপস্থিত হয়। এই ঘটনা সন্দৰ্ভত কাজিৰঙাৰ বন প্ৰাধিকাৰী ৰমেশ কুমাৰ গগৈয়ে (Ramesh Kr Gogoi) সামগ্ৰিক তদন্ত অব্যাহত ৰাখে বুলি সংবাদ মাধ্যমক জানিবলৈ দিয়ে।
