অসমৰ পৰা অব্যাহত আছে চোৰাং গৰুৰ (Cattle smuggling) সৰবৰাহ। নগাঁৱ (Nagaon)ৰ মাজেৰে মেঘালয় হৈ বাংলাদেশ (Bangladesh)লৈ চলি আছে গৰুৰ চোৰাং সৰবৰাহ। অসমৰ বিভিন্ন স্থানৰ পৰা বিশেষকৈ উত্তৰ আৰু উজনি অসমৰ পৰা নগাঁও বাইপাচ পথেৰে মেঘালয় হৈ বাংলাদেশলৈ সৰবৰাহ হয় চোৰাং গৰু।
আজি পুনৰ নগাঁৱৰ বৰঘাট আৰক্ষী (Nagaon Barghat Police) পহৰা চকীৰ আৰক্ষীয়ে গৰুভৰ্তি বৃহৎ এখন কনটেইনাৰ জব্দ (Container seized) কৰে । উজনি অসমৰ পৰা নগাঁও হৈ মেঘালয় অভিমুখে গৈ থকা অৱস্থাত এখন গৰুভৰ্তি কন্টেনাৰ গাড়ী আজি নগাঁৱত জব্দ হোৱাৰ পাচত এই তথ্য পোহৰলৈ আহে ।
আজি নগাঁও আৰক্ষীৰ অভিযানত জব্দ হয় চোৰাংকৈ সৰবৰাহ কৰা গৰুভৰ্তি এখন কন্টেনাৰ গাড়ী। নগাঁৱৰ বৰঘাট আৰক্ষী চকীৰ আৰক্ষীৰ এটা দলে গোপন সূত্ৰৰ তথ্যৰ ভিত্তিত অভিযান চলাই মেঘালয় অভিমুখে গৈ থকা অৱস্থাত গৰুভৰ্তি কন্টেনাৰ জব্দ কৰিবলৈ সক্ষম হয়। আৰক্ষীয়ে খেদি খেদি জব্দ কৰে এ এছ-২৫ ই চি ৩৩৪১ নম্বৰৰ গৰু ভৰ্ত্তি কণ্টেনাৰখন। আৰক্ষীয়ে কণ্টেনাৰখনৰ চালক ৰফিকুল ইছলামক আটক কৰিবলৈ সক্ষম হয়।
ধৃত ৰফিকুল ইছলাম (Rafiqul Islam)ৰ ঘৰ পশ্চিম গাৰোপাহাৰৰ ভাঙ্গাপাৰত বুলি আৰক্ষীয়ে জানিবলৈ দিয়ে। আৰক্ষীয়ে কন্টেনাৰখনৰ পৰা চোৰাংকৈ সৰবৰাহ কৰা ৩৬ টা গৰু জব্দ কৰে। চিলাপথাৰৰ পৰা কৌশলেৰে কন্টেনাৰখনত ভৰাই সৰবৰাহকাৰীয়ে গৰু সমূহ মেঘালয়লৈ নিয়াৰ চেষ্টা চলাইছিল যদিও নগাঁও আৰক্ষীয়ে তৎপৰতাৰে কন্টেনাৰসহ গৰুসমূহ জব্দ কৰিবলৈ সক্ষম হয়।
উল্লেখ্য যে বিগত সময়ত চোৰাং গৰু সৰবৰাহকাৰীয়ে আৰক্ষীৰ চকুত ধূলি দিবৰ বাবে গৰু সৰবৰাহৰ ক্ষেত্ৰত বিলাসী বাহন, নৈশবাছৰ লগতে ৰোগী কঢ়িওৱা এম্বুলেন্স আদিও ব্যৱহাৰ কৰি আহিছে।
