এগৰাকী আইপিএছ বিষয়া (IPS Officer)। আনগৰাকী আইএএছ (IAS)। দেওবাৰে ছচিয়েল মিডিয়াত (Social Media) ৰাজ্যৰ উচ্চ পদস্থ মহিলা বিষয়া দুগৰাকীয়ে ইগৰাকীয়ে সিগৰাকীৰ ওপৰত বাক্যবাণ নিক্ষেপ কৰিবলৈ আৰম্ভ কৰে। অৱশেষত কৰ্ণাটক চৰকাৰে (Government of Karnataka) তেওঁলোকক বাধা দিবলৈ হস্তক্ষেপ কৰিবলগীয়া হয়।
খবৰ অনুসৰি, চৰকাৰী বিষয়া দুগৰাকীৰ নাম হৈছে ডি ৰূপা আৰু ৰোহিণী সিন্ধুৰী। ইয়াৰ ভিতৰত ৰূপা এগৰাকী আইপিএছ বিষয়া আৰু তেওঁ কৰ্ণাটক ৰাজ্যিক হস্তশিল্প উন্নয়ন নিগমৰ পৰিচালন সঞ্চালক। ৰূপাই আইএএছ বিষয়া ৰোহিণীৰ বিৰুদ্ধে অভিযোগ কৰে যে ৰোহিণীয়ে কেইবাজনো পুৰুষ আইএএছ বিষয়ালৈ নিজৰ এখন ছবি প্ৰেৰণ কৰিছিল।
ৰূপাই লগতে উল্লেখ কৰে যে ৰোহিণীৰ এই ছবিখন বহু লোকৰ লগত শ্বেয়াৰ কৰাটো নিয়মৰ বাহিৰত।ৰূপাই ফেচবুকত লিখিছে, “এই ছবিবোৰ স্বাভাৱিক যেন লাগিব পাৰে। কিন্তু এগৰাকী মহিলা আইএএছ বিষয়াই যদি এনে ছবি আন এজন আইএএছ বিষয়ালৈ প্ৰেৰণ কৰে তেন্তে ইয়াৰ অৰ্থ কি? এতিয়া ই ব্যক্তিগত বিষয় নহয়। এইটো নিয়মৰ বিৰুদ্ধে। চেলুনৰ ছবি বা শুই থকা ছবি পঠোৱাটো স্বাভাৱিক যেন লাগিব পাৰে, কিন্তু এই ছবিবোৰ যি পৰিস্থিতিত পঠোৱা হৈছিল, সেইটোৱে বেলেগ কথা কয়।”
কিন্তু ৰূপাৰ অভিযোগটো ৰোহিণীয়ে একেবাৰে ভালকৈ লোৱা নাছিল। ৰোহিণীয়ে দাবী কৰে যে ৰূপাৰ অভিযোগ ভিত্তিহীন আৰু ছবিৰ সহায়ত ৰূপাৰ বদনাম কৰা হৈছে। ৰোহিণীয়ে দাবী কৰে যে ৰূপাই তেওঁৰ প্ৰতি থকা ‘ব্যক্তিগত ঘৃণাʼৰ বাবেই এই ভুৱা অভিযোগ উত্থাপন কৰিছে। লগতে ৰূপাৰ বিৰুদ্ধে আইনী ব্যৱস্থা গ্ৰহণ কৰাৰ হুংকাৰ দিয়ে।
ৰোহিণীয়ে ফেচবুকত ৰূপাক প্ৰতি অভিযোগ কৰি লিখিছে, “ৰূপাই সদায় সংবাদ মাধ্যমৰ দৃষ্টি আকৰ্ষণ কৰিবলৈ চেষ্টা কৰে আৰু তেওঁৰ ফেচবুক একাউণ্টেই তাৰ প্ৰমাণ। এই মুহূৰ্তত মোৰ জৰিয়তে দৃষ্টি আকৰ্ষণ কৰাৰ প্ৰয়াস চলি আছে।”
সমগ্ৰ বিষয়টো পোহৰলৈ অহাৰ পিছত কৰ্ণাটকৰ গৃহমন্ত্ৰী আৰগা জ্ঞানেন্দ্ৰই দুয়োগৰাকী বিষয়াৰ বিৰুদ্ধে কঠোৰ ব্যৱস্থা গ্ৰহণৰ নিৰ্দেশ দিয়ে। লগতে তেওঁ মন্তব্য কৰে যে সমগ্ৰ বিষয়টো মুখ্যমন্ত্ৰীৰ পৰ্যবেক্ষণত আছে।
