নগাঁও, ১৫ ফেব্ৰুৱাৰী: নগাঁও জিলাৰ সদৰ শিক্ষা খণ্ডৰ অন্তৰ্গত মিলনপুৰস্থিত খাগৰিজান নিম্ন বুনিয়াদী বিদ্যালয়ত আজি অনুষ্ঠিত “ৰাইজৰ উৎসৱ” কাৰ্যসূচীত মুখ্য অতিথি হিচাপে অংশগ্ৰহণ কৰে নগাঁও সদৰ সমষ্টিৰ বিধায়ক ৰূপক শৰ্মাই (MLA Rupak Sarma)।
উল্লেখ্য যে অসম চৰকাৰৰ শিক্ষা বিভাগৰ নিৰ্দেশনা অনুসৰি বিদ্যালয়ৰ শিক্ষক-শিক্ষয়িত্ৰী ,ছাত্ৰ-ছাত্ৰী আৰু অভিভাৱক-অভিভাৱিকা সকলৰ মাজত এক সু-সমন্ধ গঢ়ি তোলাৰ উদ্দেশ্যে শিক্ষা বিভাগৰ উদ্যোগত “ৰাইজৰ উৎসৱ” কাৰ্যসূচী অনুষ্ঠিত কৰা হয়। ৰাইজৰ উৎসৱ কাৰ্যসূচীত অংশগ্ৰহণ কৰি বিধায়ক ৰূপক শর্মাই বৰ্তমানৰ চৰকাৰখনে শিক্ষা ক্ষেত্ৰত আমূল পৰিৱর্তন অনা বুলি উল্লেখ্য কৰি লগতে কয় যে শিক্ষা হৈছে এটা জাতিৰ মেৰুদণ্ড স্বৰূপ।
শিক্ষাৰ দ্বাৰাহে সমাজৰ পৰা কুসংস্কাৰ দূৰ কৰাটো সম্ভৱ । সেয়ে সমাজৰ প্ৰতিজন মানুহ শিক্ষিত হোৱাটো অতিকৈ প্ৰয়োজন । বিধায়ক শৰ্মাই শিক্ষক সকলক নিজৰ দায়িত্ব সুচাৰুৰূপে পালন কৰিবলৈ আহ্বান জনায় । মিলনপুৰ সমল কেন্দ্ৰৰ সমন্বয়ক মনালিছা বৰাই আঁত ধৰা অনুষ্ঠানত নগাঁৱৰ অতিৰিক্ত উপায়ুক্ত (শিক্ষা )প্ৰশান্ত বৰুৱা আৰু নগাঁও জিলা সাহিত্য সভাৰ প্ৰাক্তন সভাপতি ৰতিমোহন নাথেও ভাষন দিয়ে ।
সভাত নগাঁও পৌৰসভাৰ সভানেত্ৰী অম্বিকা মজুমদাৰ, বিদ্যালয় সমূহৰ উপ পৰিদৰ্শক দেৱেন চন্দ্ৰ লহকৰ, জ্যেষ্ঠ সাংবাদিক জিতেন বৰকটকী, ডিপিঅ এফ এল এম প্ৰশান্তি বৰা প্ৰমুখ্যে বিশিষ্ট ব্যক্তি সকল উপস্থিত থাকে । আনহাতে মিলনপুৰস্থিত খাগৰিজান নিম্ন বুনিয়াদী বিদ্যালয়ত অনুষ্ঠিত “ৰাইজৰ উৎসৱ”ৰ কাৰ্যসূচীত কানু লস্কৰৰ পৰিচালনাত বিদ্যালয়খনৰ শিক্ষক-শিক্ষয়ত্ৰী আৰু ছাত্র-ছাত্ৰী সকলে বাল্য বিবাহৰ সজাগতা ওপৰত এখনি বাটৰ নাট পৰিবেশন কৰে।
সভাত ক্ৰীড়া আৰু সাংস্কৃতিক বিভাগৰ বিভিন্ন প্ৰতিযোগিতাত স্হান লাভ কৰা ছাত্ৰ-ছাত্রী সকলক বঁটা সমূহ প্ৰদান কৰা হয় । আনহাতে ৰাইজৰ উৎসৱৰ লগত সংগতি ৰাখি মণ্ডল সমল কেন্দ্ৰটোৰ অধীনস্হ বিদ্যালয় সমূহৰ ছাত্ৰ-ছাত্রী সকলে নিৰ্মান কৰা প্ৰকল্পৰে আয়োজন কৰা প্ৰদৰ্শনীৰ দ্বাৰ মুকলি কৰে সাহিত্যিক ৰতিমোহন নাথে।
