তুৰস্কত (Turkey) ১৮২ ঘণ্টা ধৰি ধ্বংসাৱশেষৰ তলত আবদ্ধ হৈ থকা এজন কিশোৰক জীৱিত অৱস্থাত উদ্ধাৰ (Rescued alive) কৰা হৈছে।তুৰস্কৰ হাটাই প্ৰদেশত সোমবাৰে ধ্বংসাৱশেষৰ পৰা উদ্ধাৰ কৰা হয় ১৩ বছৰীয়া কিশোৰজনক। এই উদ্ধাৰ অভিযানৰ এটা ভিডিঅ’ ভাইৰেল হৈছে ছচিয়েল মিডিয়াত। দক্ষিণ প্ৰদেশ হাটাইত উদ্ধাৰ কৰ্মীয়ে কিশোৰজনক ধ্বংসাৱশেষৰ তলৰ পৰা উলিয়াই অনা দেখা গৈছে। কিশোৰজনক এম্বুলেন্সত ষ্ট্ৰেচাৰত উঠাই লৈ যোৱা হয়।
অত্যন্ত ঠাণ্ডাৰ বাবে কিশোৰজনৰ শৰীৰ আৰু মূৰত কম্বল ঢাকি থোৱা হয়।উল্লেখ্য, শেহতীয়াকৈ তুৰস্কৰ দক্ষিণ অঞ্চল আৰু চুবুৰীয়া ৰাষ্ট্ৰ ছিৰিয়াৰ সীমান্ত অঞ্চলত ৭.৮ প্ৰাবল্যৰ প্ৰবল ভূমিকম্প সংঘটিত হয়। সেই অঞ্চলবোৰ এই ভয়াবহ ভূমিকম্পৰ ফলত বিধ্বস্ত হৈ পৰে। বিভিন্ন উদ্ধাৰকাৰী দলে এতিয়াও ধ্বংসাৱশেষৰ তলৰ পৰা আহত বা জীৱিতসকলক উলিয়াই আনিবলৈ উদ্ধাৰ প্ৰচেষ্টা অব্যাহত ৰাখিছে।
কিন্তু সময়ৰ লগে লগে জীৱিত যিকোনো ব্যক্তিক উদ্ধাৰ কৰাৰ আশা ম্লান হৈ আহিছে। ইয়াৰ ভিতৰত এই কিশোৰৰ ঘটনাই অঞ্চলটোত চাঞ্চল্যৰ সৃষ্টি কৰিছে। তুৰস্ক আৰু ছিৰিয়াত এই ভূমিকম্পত মৃত্যু হোৱা লোকৰ সংখ্যা এতিয়ালৈকে ৩৭ হাজাৰ হৈছেগৈ। ইয়াৰে তুৰস্কত ৩১ হাজাৰ ৬৪৩ জন আৰু ছিৰিয়াত ৫ হাজাৰ ৭৪ জন লোকৰ মৃত্যু হৈছে।
