উচ্চতম ন্যায়ালয়ে (Suprem Court) আদানী সংকটৰ পিছৰ পৰিণতিৰ ওপৰত চকু ৰাখিবলৈ বিশেষজ্ঞ সমিতি গঠনৰ প্ৰস্তাৱ আগবঢ়ায়। মুখ্য ন্যায়াধীশ ডি ৱাই চন্দ্ৰচুড়ৰ নেতৃত্বত গঠিত বিচাৰপীঠে শ্বেয়াৰ বজাৰৰ বিশেষজ্ঞৰ (Stock market experts) বাহিৰে কমিটীৰ এজন ন্যায়াধীশক ৰখাৰ প্ৰস্তাৱ আগবঢ়াইছে। আদানী সংকটৰ বাবে ভাৰতীয় বিনিয়োগকাৰীৰ যাতে কোনো ক্ষতি নহয় তাৰ বাবে উচ্চতম ন্যায়ালয়ে এই সমিতি গঠনৰ প্ৰস্তাৱ আগবঢ়াইছে।
আমেৰিকাৰ বিনিয়োগ গৱেষণা সংস্থা ‘হিণ্ডেনবাৰ্গ ৰিচাৰ্চʼ-এ প্ৰধানমন্ত্ৰী নৰেন্দ্ৰ মোদীৰ ঘনিষ্ঠ বুলি পৰিচিত গৌতম আদানী (Gautam Adani)ৰ কোম্পানীটোৰ বিৰুদ্ধে শ্বেয়াৰ মূল্যত হেতালি খেলা আৰু কৰ ফাঁকিকে ধৰি অবৈধ বিত্তীয় লেনদেনৰ অভিযোগ উত্থাপন কৰিছে। এই সন্দৰ্ভত কেন্দ্ৰক লক্ষ্য কৰি লৈছে বিৰোধীয়ে। অৱশ্যে সকলো অভিযোগ খাৰিজ কৰিছে আদানীয়ে।
এই বিষয়ত উচ্চতম ন্যায়ালয়ৰ হস্তক্ষেপ বিচাৰি দাখিল কৰা আবেদনৰ শুনানিৰ সময়ত মুখ্য ন্যায়াধীশ চন্দ্ৰচুৰে কয়, “এনে পৰিস্থিতিৰ পুনৰাবৃত্তি ৰোধৰ বাবে আমি ব্যৱস্থা গ্ৰহণ কৰিব লাগিব নেকি? নীতিগত বিষয়ত আমি হস্তক্ষেপ কৰিব নিবিচাৰো। সেয়া চৰকাৰৰ কাম।”
মুখ্য ন্যায়াধীশগৰাকীয়ে কয়, “আমি এখন বিশেষজ্ঞ সমিতি গঠনৰ পৰামৰ্শ দিছো। চৰকাৰো এই বিষয়ত আগ্ৰহী হোৱা উচিত। শ্বেয়াৰ বজাৰৰ নিয়ন্ত্ৰণ ব্যৱস্থা আৰু ভাৰতীয় বিনিয়োগকাৰীৰ স্বাৰ্থ সুৰক্ষাৰ বিষয়ে আমি ছলিচিটৰ জেনেৰেলৰ ওচৰত আমাৰ উদ্বেগ প্ৰকাশ কৰিছো।”
মুখ্য ন্যায়াধীশগৰাকীয়ে জনাই যে ছলিচিটৰ জেনেৰেলে জনাইছে বজাৰ নিয়ন্ত্ৰণ সংস্থা ছেবি-য়ে বজাৰ নিয়ন্ত্ৰণৰ বাবে কাম কৰে। পৰিস্থিতি নিৰীক্ষণ কৰি আছে। মুখ্য ন্যায়াধীশগৰাকীয়ে কয়, “আমি কোনো নিয়ন্ত্ৰণকাৰী সংস্থাৰ সুনাম কলংকিত কৰিব নিবিচাৰো।” ছলিচিটৰ জেনেৰেল তুষাৰ মেহতাই জনায় যে ছেবিৰ সৈতে আলোচনা কৰি সোমবাৰে আদালতত প্ৰস্তাৱ আগবঢ়াব।
খবৰ অনুসৰি, আদানীয়ে নিউয়ৰ্কৰ প্ৰধান আইনী পৰামৰ্শদাতা প্ৰতিষ্ঠান ৱাচটেল, লিপটন, ৰোজেন এণ্ড কাটজক নিয়োগ কৰিছে। ইলন মাস্কৰ আইনী পৰামৰ্শদাতা হিচাপে কাম কৰিছিল এই প্ৰতিষ্ঠানটোৱে। সংবাদ মাধ্যমৰ এটা অংশৰ মতে, আদানীয়ে আমেৰিকাৰ ‘হিণ্ডেনবাৰ্গ ৰিচাৰ্চʼৰ বিৰুদ্ধে আইনী ব্যৱস্থা লʼব পাৰে।
