বোকাখাত (Bokakhat)ৰ লখৌজানৰ (Lakhhoujan) বিশিষ্ট নাগৰিক বকুল দত্ত (Bakul Dutta)ৰ আজি পুৱা দেহাৱসান (Death) ঘটে (৮৮)। প্ৰাথমিক বিদ্যালয়ৰ অৱসৰী শিক্ষক (Retd. Teacher) বকুল দত্ত বোকাখাত মহকুমা শিক্ষক সন্মিলনী আৰু কুৰুৱাবাহী প্ৰাথমিক শিক্ষক সন্মিলনী গঠনৰ অন্যতম ব্যক্তি। বোকাখাত মহকুমা অৱসৰপ্ৰাপ্ত শিক্ষক কৰ্মচাৰী সন্থাৰো প্ৰতিষ্ঠাপক সম্পাদক আছিল তেখেত।
অংকুৰণ সাহিত্য সভাৰ সভাপতি দত্ত দেৱে শিক্ষক হিচাপে উৎসৰ্গিত মনোভাৱেৰে সেৱা আগ বঢ়াই গৈছিল। অসম ৰাজ্যিক প্ৰাথমিক শিক্ষক সন্মিলনীয়ে প্ৰথমবাৰৰ বাবে প্ৰৱৰ্তন কৰা “শিক্ষকশ্ৰী” উপাধি লাভ কৰিছিল প্ৰয়াত গৰাকীয়ে। কাৰ্বি-আংলং জিলাৰ পাণজান এম ই স্কুলৰ প্ৰতিষ্ঠাপক প্ৰধান শিক্ষক হিচাপে কাম আৰম্ভ কৰা দত্তই পৰৱৰ্তী সময়ত বকিয়াল এম ই স্কুল প্ৰতিষ্ঠা কৰিছিল।বোকাখাতৰ ভলুকাগুৰি প্ৰাথমিক বিদ্যালয়,তাৰ পাছতে গোহাঁই গাঁও প্ৰাথমিক বিদ্যালয়ত শিক্ষক জীৱন সমাপ্ত কৰে।
কৃতী শিক্ষকগৰাকীয়ে একালত প্ৰাথমিক বিদ্যালয়ৰ ছাত্ৰ-ছাত্ৰীৰ উপযোগী কেইবাখনো পাঠ্যপুথি ৰচনা কৰিছিল।কুৰুৱাবাহী প্ৰাথমিক শিক্ষক সন্মিলনীয়ে তেখেতৰ ৮০ সংখ্যক জন্মদিন উদযাপন কৰিছিল। প্ৰকাশ পাইছিল অভিনন্দন গ্ৰন্থ। মৃত্যুৰ সময়ত প্ৰয়াত গৰাকীয়ে দুগৰাকী পুত্ৰ, ৱোৱাৰী, এগৰাকী কন্যা,নাতি নাতিনী এৰিথৈ গৈছে।তেখেতৰ বিয়োগত খবৰ বিয়পি পৰাৰ লগে লগে অজস্ৰ গুণমুগ্ধৰ সমাবেশ ঘটে আৰু শতাধিক দল সংগঠনে শেষ শ্ৰদ্ধাঞ্জলি জ্ঞাপন কৰে।
