আৰক্ষীৰ গুলীত নিহত হয় ওড়িশাৰ Odisha স্বাস্থ্যমন্ত্ৰী নৱকিশোৰ দাস Nabakishore Das। হত্যা কৰাৰ অভিযোগত অভিযুক্ত ওড়িশা আৰক্ষীৰ সহকাৰী উপ-পৰিদৰ্শকজন মানসিকভাৱে অসুস্থ। দীৰ্ঘদিন ধৰি চিকিৎসাধীন হৈ আছিল। ইয়াৰ পিছতো তেওঁক কিয় পিষ্টল দিয়া হʼল বা কোনো গুৰুত্বপূৰ্ণ আৰক্ষীৰ চকীত ৰখা হʼল, সেই সন্দৰ্ভত প্ৰশ্ন উত্থাপন হৈছে।
হত্যাকাৰী আৰক্ষীৰ নাম গোপালক্ৰুষ্ণ দাস। দেওবাৰে বিয়লি ওড়িশাৰ ঝাৰসুগুদা জিলাৰ ব্ৰজৰাজনগৰৰ গান্ধী চʼকৰ সমীপত এক অনুষ্ঠানত অংশগ্ৰহণ কৰিবলৈ গৈ থকা অৱস্থাত স্বাস্থ্যমন্ত্ৰীগৰাকীক গুলীচালনা কৰে। দুটা গুলী লাগে তেওঁৰ বুকুত। গুৰুতৰভাৱে আহত মন্ত্ৰীগৰাকীক চিকিৎসালয়ত ভৰ্তি কৰোৱা হয়। চিকিৎস তেওঁক বচাবলৈ বহুত চেষ্টা কৰে। কিন্তু দেওবাৰে সন্ধিয়া চিকিৎসালয়ত তেওঁৰ মৃত্যু হয়।
স্থানীয় ৰাইজে ধৰে আৰক্ষী জোৱানজনক। পিছত তেওঁক আৰক্ষীয়ে গ্ৰেপ্তাৰ কৰে। জানিব পৰা মতে, আৰক্ষী জোৱানজন বাইপোলাৰ ডিছঅৰ্ডাৰত Bipolar Disorder আক্ৰান্ত আছিল। ই এক প্ৰকাৰৰ মানসিক ৰোগ, যাৰ বাবে মন স্থিৰ নাথাকে। খং, বিষাদ আদি আৱেগ সঘনাই সলনি হয়। ৰোগীজন গভীৰ হতাশাত থাকে।
ওড়িশাৰ ব্ৰহ্মপুৰৰ এম কে চি জি মেডিকেল কলেজৰ মনোৰোগ বিভাগৰ মুৰব্বী চন্দ্ৰশেখৰ ত্ৰিপাঠীয়ে কয়, “৮ৰ পৰা ১০ বছৰ পূৰ্বে প্ৰথমে মোৰ ক্লিনিকলৈ গোপালক্ৰুষ্ণ চিকিৎসাৰ বাবে আহিছিল। তেওঁৰ অতি সোনকালে মূৰ গৰম হৈ যায়। তেওঁ চিকিৎসাধীন হৈ আছিল। কিন্তু নিয়মীয়াকৈ ঔষধ খাই আছিলনে নাই নাজানো। নিয়মিতভাৱে ঔষধ সেৱন নকৰিলে ৰোগৰ প্ৰাদুৰ্ভাৱ বাঢ়ি যায়। যোৱা এবছৰত গোপালক্ৰুষ্ণ মোৰ ক্লিনিকলৈ অহা নাই।”
ব্ৰহ্মপুৰত আৰক্ষী কনিষ্টবল হিচাপে কৰ্মজীৱন আৰম্ভ কৰিছিল গোপালক্ৰষ্ণই। ১২ বছৰ পূৰ্বে ঝাৰছুগুদালৈ বদলি হৈছিল। তেতিয়াৰ পৰাই তেওঁ তাতেই থাকিল। তাতেই দেওবাৰে ৰাজ্যৰ স্বাস্থ্যমন্ত্ৰীগৰাকীৰ গুলীচালনাত মৃত্যু হয়। গোপালক্ৰুষ্ণৰ হাতত অনুজ্ঞাপত্ৰ থকা পিষ্টল আছিল।
তেওঁৰ পত্নীয়েও স্বীকাৰ কৰে যে মানুহজন মানসিক ৰোগত আক্ৰান্ত হৈ ঔষধ খাই আছিল। কিন্তু গোপালক্ৰুষ্ণ পত্নী আৰু পৰিয়ালৰ লগত নাথাকে। কামৰ বাবে আঁতৰি থাকিবলগা হৈছিল। যাৰ বাবে পত্নীয়ে নিয়মিতভাৱে ঔষধ খাই আছিলনে নাই সেয়া নিশ্চিত নহয়।
আৰক্ষীৰ মতে, দেওবাৰে স্বাস্থ্যমন্ত্ৰীৰ নিৰাপত্তাৰ কামত নিয়োজিত হৈ আছিল আৰক্ষী কৰ্মীগৰাকী। মন্ত্ৰীগৰাকীক আক্ৰমণ কৰা ঠাইৰ পৰা ৫০০ মিটাৰ দূৰত মোবাইল ফোনটো এৰি থৈ যায়। গোপালক্ৰষ্ণক জেৰা অব্যাহত ৰাখিছে আৰক্ষীয়ে।