ASSAM TIMES POST
গুৱাহাটীঃ জাতিধ্বংসী নাগৰিকত্ব (সংশোধনী) বিধেয়ক, ২০১৬ৰ বিৰুদ্ধে সোমবাৰে ৰাজ্যজুৰি প্ৰতিবাদ সাব্যস্ত কৰিব বাঁও-গণতান্ত্ৰিক মঞ্চ, অসমে। এক প্ৰেছ বিজ্ঞপ্তিৰ জৰিয়তে এই কথা সদৰী কৰিছে বাঁও-গণতান্ত্ৰিক মঞ্চ, অসমৰ আহ্বায়ক দেবেন ভট্টাচাৰ্যই।
তেওঁ জনোৱা মতে, ১৮ নৱেম্বৰত সমগ্র ৰাজ্যখনত যৌথভাৱে আন্দোলন সংগঠিত কৰিব মঞ্চৰ অন্তৰ্ভুক্ত দলসমূহ যথা চিপিআই (এম), চিপিআই, চিপিআই (এম-এল), জনতা দল (এছ), এনচিপি, অসম সংগ্ৰামী মঞ্চ, আম আদমী পাৰ্টি, লিবাৰেল ডেমক্ৰেটিক পাৰ্টি আৰু আৰচিপিআই এ। সোমবাৰৰ কাৰ্যসূচীসমূহৰ মাজত থাকিব সভা-সমাবেশ-ধৰ্ণা-বিক্ষোভ আদি।
এই প্ৰতিবাদী আন্দোলনত যোগদান কৰি দেশৰ সংবিধান তথা ধৰ্মনিৰপেক্ষ চৰিত্ৰ ৰক্ষাৰ হকে আৰু বিজেপি চৰকাৰৰ অসমবিৰোধী পদক্ষেপৰ বিৰুদ্ধে মাৰবান্ধি থিয় দিয়াৰ বাবে ৰাজ্যখনৰ সৰ্বস্তৰৰ জনসাধাৰণৰ প্ৰতি মঞ্চই আহ্বান জনাইছে।
গুৱাহাটীত প্ৰতিবাদী কাৰ্যসূচীৰ অংশ হিচাপে বাঁও-গণতান্ত্ৰিক দলসমূহৰ সভ্য-সমৰ্থকৰ উপৰি স্বাধীন মতাৱলম্বী বিভিন্ন অংশৰ ৰাইজ দিনৰ ১১ বজাত গুৱাহাটী ক্লাবৰ সমীপৰ বেজবৰুৱা চ’ক (ৰ’টাৰী পইণ্ট)ত সমবেত হৈ অৱস্থান-ধৰ্মঘটত অংশগ্ৰহণ কৰিব আৰু ইয়াৰ পাছতে দিনৰ এক বজাত জিলা উপায়ুক্তৰ কাৰ্যালয়লৈ সমদল কৰি গৈ উপায়ুক্তৰ জৰিয়তে প্ৰধানমন্ত্ৰীলৈ স্মাৰক-পত্ৰ প্ৰেৰণ কৰিব।
