১০০০ আৰু ৫০০ টকীয়া পুৰণি নোট বাতিল কৰাৰ সিদ্ধান্তক প্ৰত্যাহ্বান জনোৱা গোচৰত সোমবাৰে উচ্চতম ন্যায়ালয়ে Supreme Court ৰায় দিয়ে। ৰায়দানত কোৱা হৈছে যে কেন্দ্ৰৰ সিদ্ধান্তত কোনো ভুল নাই। আৰু তাৰ বাবে উচ্চতম ন্যায়ালয়ে Supreme court কেন্দ্ৰৰ সিদ্ধান্তক সমৰ্থন কৰে। কেন্দ্ৰীয় চৰকাৰৰ কোনো বিত্তীয় সিদ্ধান্তক উভতাই ল’ব নোৱাৰিব বুলিও উচ্চতম ন্যায়ালয়ে কয়।
উচ্চতম ন্যায়ালয়ে পৰ্যবেক্ষণ কৰে যে সিদ্ধান্ত লোৱাৰ ধৰণ বিবেচনা কৰিলে কেন্দ্ৰৰ সিদ্ধান্ত বাতিল কৰিব নোৱাৰি। ৰিজাৰ্ভ বেংকৰ সৈতে ছমাহৰ আলোচনাৰ অন্তত কেন্দ্ৰই বিমুদ্ৰাকৰণ Demonetisation ৰ সিদ্ধান্ত গ্ৰহণ কৰে। এই ৰায় ঘোষণা কৰাৰ সময়ত এই কথা কয় উচ্চতম ন্যায়ালয়ৰ সংবিধান বিচাৰপীঠে। কেন্দ্ৰৰ এই সিদ্ধান্তৰ সপক্ষে চাৰিজন ন্যায়াধীশে ভোটদান কৰাৰ বিপৰীতে এজন ন্যায়াধীশে বিৰোধত ভোটদান কৰে।
বিমুদ্ৰাকৰণৰ সিদ্ধান্তক প্ৰত্যাহ্বান জনাই উচ্চতম ন্যায়ালয়ত ৫৮খন আবেদন দাখিল কৰা হয়। আবেদনকাৰীসকলে যুক্তি আগবঢ়ায় যে চৰকাৰে সঠিক পৰিকল্পনাৰে এই সিদ্ধান্ত লোৱা নাই আৰু শীঘ্ৰে এই সিদ্ধান্ত বাতিল কৰিব লাগে। চৰকাৰৰ প্ৰতিবাদী যুক্তি আছিল যে কাৰ্যক্ষেত্ৰত এই সিদ্ধান্ত বাতিল কৰাটো সম্ভৱ নহয়। কেন্দ্ৰৰ অধিবক্তাই লগতে দাবী কৰে যে যদি বিমুদ্ৰাকৰণৰ সিদ্ধান্ত বাতিল কৰিব লাগে তেন্তে ‘সময়ক পিছুৱাই লৈ গৈ’ বাতিল কৰিব লাগিব।
ন্যায়াধীশ এছ এ নাজিৰৰ নেতৃত্বত গঠিত পাঁচজনীয়া সংবিধান বিচাৰপীঠে শীতকালীন বিৰতিৰ পূৰ্বে দুয়োপক্ষৰ যুক্তি শুনিছিল আৰু ৭ ডিচেম্বৰত ৰায় সংৰক্ষিত কৰিছিল। সংবিধান বিচাৰপীঠৰ আন সদস্যসকল হৈছে ন্যায়াধীশ বি আৰ গাৱৈ, বি ভি নাগাৰত্ন, এ এছ বোপন্না আৰু ভি ৰামাসুব্ৰমণিয়ম। এই গোচৰত ন্যায়াধীশ বি আৰ গাভাই আৰু ন্যায়াধীশ বি ভি নাগাৰাথ্নাই দুটা পৃথক ৰায় দিয়া বুলিও জল্পনা-কল্পনাৰ সৃষ্টি হৈছিল।
উল্লেখ্য, ২০১৬ চনৰ ৮ নৱেম্বৰত কেন্দ্ৰৰ বিজেপি চৰকাৰে ৫০০ আৰু ১০০০ টকীয়া নোট বাতিল কৰি নতুন ৫০০ আৰু ২০০০ টকীয়া নোট প্ৰৱৰ্তন কৰাৰ সিদ্ধান্ত লয়। কেন্দ্ৰৰ যুক্তি আছিল যে চৰকাৰে এই সিদ্ধান্ত লৈছিল অবাধ কʼলা ধন বন্ধ কৰিবলৈ।
ইয়াৰ উপৰি চৰকাৰে দাবী কৰিছিল যে যদি পুৰণি নোট সলনি কৰা হয় তেন্তে কʼলা ধন ৰখা লোকসকল বিপদত পৰিব, লগতে ভাৰতীয় অৰ্থনীতিত স্বচ্ছতা আহিব। কিন্তু বিমুদ্ৰাকৰণৰ পিছত সম্পূৰ্ণ বেলেগ ছবি এখন দেখা যায়। সমগ্ৰ দেশতে সমস্যাৰ সন্মুখীন হৈছে সাধাৰণ লোক। নতুন টকা পাবলৈ বেংকৰ বাহিৰত ভিৰ কৰিবলগা হয়। টকা সলনি কৰাৰ বাবে হোৱা ভিৰত দেশবাসীয়ে মৃত্যুও দেখিছিল।
