বৃহস্পতিবাৰৰ পৰা আৰম্ভ হৈছে প্ৰধানমন্ত্ৰী নৰেন্দ্ৰ মোদী আৰু কেন্দ্ৰীয় গৃহমন্ত্ৰী অমিত শ্বাহৰ গৃহৰাজ্য গুজৰাটৰ দুটা পৰ্যায়ৰ বিধানসভা নিৰ্বাচন। ১৮২টা সমষ্টিৰ ভিতৰত কুচ, সৌৰাষ্ট্ৰ আৰু দক্ষিণ গুজৰাট জিলাৰ ৮৯টা সমষ্টিত প্ৰথম পৰ্যায়ত নিৰ্বাচন অনুষ্ঠিত হৈছে। য’ত ৭৮৮ গৰাকী প্ৰাৰ্থীৰ ভাগ্য নিৰ্ণয় হʼব।
গুজৰাটৰ মুখ্য নিৰ্বাচনী বিষয়াৰ কাৰ্যালয়ৰ প্ৰেছ বিজ্ঞপ্তি অনুসৰি, ১৪,৩৮২টা কেন্দ্ৰত পুৱা ৮ বজাৰ পৰা বিয়লি ৫ বজালৈ ভোটগ্ৰহণ অনুষ্ঠিত হʼব। মোদী-শ্বাহ ৰাজ্যৰ ৪ কোটি ৯১ হাজাৰ ভোটাৰৰ ভিতৰত ২ কোটি ৩৯ লাখ লোকে প্ৰথম পৰ্যায়ত ভোটাধিকাৰ সাব্যস্ত কৰিব।
প্ৰথম পৰ্যায়ৰ উল্লেখযোগ্য প্ৰাৰ্থীৰ ভিতৰত আছে ক্ৰিকেটাৰ ৰবীন্দ্ৰ জাদেজাৰ পত্নী ৰিভাবা (জামনগৰ-উত্তৰ, বিজেপি), প্ৰাক্তন বিৰোধী নেতা পৰেশ ধনানী (আমৰেলী, কংগ্ৰেছ), ‘গডমাদাৰ’ সন্তকবেনৰ পুত্ৰ আৰু ‘বাহুবলীʼৰ বিদায়ী বিধায়ক কন্ধল জাদেজা (কুটিয়ানা) আৰু আম আদমি পাৰ্টিৰ (আপ) ‘মুখ্যমন্ত্ৰী’ প্ৰাৰ্থী তথা টিভি উপস্থাপক ইছুদন ঘৰবী (খাম্বলিয়া)।
২০১৭ চনৰ বিধানসভা নিৰ্বাচনত এই ৮৯খন আসনৰ ভিতৰত ৪৮খন আসনত বিজেপিয়ে জয়লাভ কৰিছিল। কংগ্ৰেছ আৰু ইয়াৰ মিত্ৰ দলসমূহে ৪০টাত জয়লাভ কৰে। পিছত কেইবাজনো কংগ্ৰেছ বিধায়কে বিজেপিত যোগদান কৰে। এইবাৰ ভোটৰ যুঁজ ত্ৰিকোণীয়া। কংগ্ৰেছ আৰু বিজেপিৰ সমান্তৰালভাৱে অৰবিন্দ কেজৰিৱালৰ আপ।
শেহতীয়াকৈ চুৰাটকে ধৰি একাংশ চহৰৰ উপ-নিৰ্বাচনত কংগ্ৰেছৰ পিছতে আপে দ্বিতীয় স্থান লাভ কৰিছে। এই নিৰ্বাচনত কেজৰিৱালে সমগ্ৰ গুজৰাটত ধাৰাবাহিকভাৱে প্ৰচাৰ চলাইছিল। তেওঁ দাবী কৰে যে বিধানসভা নিৰ্বাচনতো বিজেপিৰ মূল যুঁজ আপৰ সৈতে হʼব।
উল্লেখ্য, ২০১৭ চনৰ গুজৰাটত বিধানসভা নিৰ্বাচনত ৯৯খন আসন লাভ কৰি একেৰাহে পঞ্চমবাৰৰ বাবে বিজেপিয়ে ক্ষমতালৈ আহিছিল। কিন্তু ১৯৯০ চনৰ পিছত বিজেপিয়ে সৰ্বনিম্ন সংখ্যক আসন লাভ কৰিছিল।
আনহাতে, ২০১৭ চনৰ বিধানসভা নিৰ্বাচনত কংগ্ৰেছে ৭৭খন আসন লাভ কৰি বহু ৰাজনৈতিক বিশ্লেষকক আচৰিত কৰি তুলিছিল। নিৰ্দলীয় আৰু আনসকলে ৬খন আসন লাভ কৰে। এইবাৰ ষষ্ঠবাৰৰ বাবে ক্ষমতালৈ ঘূৰি অহাৰ বাবে আশাবাদী পদ্ম-শিবিৰ।
