তেজপুৰৰ পৰা অজন্তা তালুকদাৰঃ ক্ষিপ্ৰ গতিত চলি আছে অনাগত ২২, ২৩ আৰু ২৪ নৱেম্বৰত অসমৰ সাংস্কৃতিক ৰাজধানী তেজপুৰৰ পেষ্ট্ৰলাৰ কেন্দ্ৰ ক্ষেত্ৰত অনুষ্ঠিত হ’ব লগীয়া সৰ্ব ভাৰতীয় মহিলা কবি সন্মিলন (All India Poetess Conference)ৰ উনবিংশতিতম মহাঅধিবেশনৰ প্ৰস্তুতি।
যোৱা ৮ নৱেম্বৰত তেজপুৰৰ ঐতিহ্যমণ্ডিত তৰুণ অসম সংঘত এই উদ্দেশ্যে অনুষ্ঠিত হৈ যায় সৰ্ব ভাৰতীয় মহিলা কবি সন্মিলনৰ উনবিংশতিতম মহাঅধিবেশনৰ আদৰণি সমিতিৰ এখনি সম্বৰ্দ্ধনা আৰু সাংবাদিক সভা। অনুষ্ঠানত অসমৰ সদস্যা সকলক উৎসাহিত কৰিবলৈ সুদূৰ উত্তৰ প্ৰদেশৰ পৰা আহি উপস্থিত হোৱা সন্মিলনৰ প্ৰতিষ্ঠাপক অধ্যাপক ড° লাৰী আজাদক অসমৰ বিভিন্ন ঠাইৰ পৰা অহা সদস্যা সকলে আদৰণি আৰু সম্বৰ্দ্ধনা জনায়। উল্লেখ্য যে ২০০০ বৰ্ষত উত্তৰ প্ৰদেশৰ খোৰ্জা চহৰত এই অক্লান্ত সংগঠক গৰাকীয়ে ভাৰতৰ বিদুষী আৰু সৃজনশীল মহিলা কবিক একেখনি আকাশৰ তলত গোট খুৱাবলৈ কৰা প্ৰচেষ্টাই ইতিমধ্যে ভাৰতৰ ২৯ খন ৰাজ্য আৰু মালয়চিয়া, হংকং, চীন, ইংলেণ্ড, ফ্ৰান্স, চুইজাৰলেণ্ড, অষ্ট্ৰেলিয়া, বেলজিয়ামকে আদি কৰি বিশ্বৰ বিভিন্ন দেশৰ মুঠ আঁঠ হাজাৰৰো অধিক মহিলা কবিক AIPC পৰিয়ালত একত্ৰিত কৰি ল’বলৈ সক্ষম হৈছে।
অনুষ্ঠানৰ আৰম্ভণিতে অনাগত ২২, ২৩ আৰু ২৪ নৱেম্বৰত তেজপুৰত অনুষ্ঠিত হ’ব লগীয়া সৰ্ব ভাৰতীয় মহিলা কবি সন্মিলনৰ উনবিংশতিতম মহাঅধিৱেশনৰ প্ৰস্তুতি সম্পৰ্কে অৱগত কৰায় অনুষ্ঠানটিৰ আহ্বায়িকা মনোমতী কুৰ্মীয়ে। সভাৰ সভাপতিত্ব কৰে আদৰণি সমিতিৰ সভাপতি ড° চাৰু চহৰীয়া নাথে। সভাত ড° লাৰী আজাদে এটি সাৰগৰ্ভ ভাষনেৰে মহিলা কবি সকলক আগবাঢ়ি যাবলৈ প্ৰেৰণা যোগোৱাৰ লগতে উপস্থিত সকলোকে আহ্লাদিত কৰে। অনুষ্ঠানটিৰ অসম সংযোজক সুৰজিতা গগৈ আৰু স্মৃতিগ্ৰন্থৰ সম্পাদিকা স্নিগ্ধাৰাণী গগৈ, সদস্যা বৰ্ণালী শৰ্মা বৰুৱা, চিন্ময়ী গগৈ আদিয়ে সভাত বক্তব্য ৰাখে। সভাৰ আঁত ধৰে আদৰণি সমিতিৰ সম্পাদিকা মীনাক্ষী দেৱীয়ে।
অনুষ্ঠানটিৰ অসমৰ সদস্যা সকলে পৰিবেশন কৰা এটি সমবেত সংগীতেৰে আৰম্ভ হোৱা উক্ত সভাত জ্যোতি সংগীত আৰু ভূপেন্দ্ৰ সংগীত পৰিবেশন কৰে শিল্পীদ্বয় ক্ৰমে কল্পনা কলিতা আৰু মীনাক্ষী দেৱীয়ে। উক্ত সভাত শোনিতপুৰ জিলা সাংবাদিক সন্থাৰ সভাপতি সঞ্জীৱ হাজৰিকাৰ লগতে নিউজ লাইভ, প্ৰাগ চেনেল, আচাম টাইমচ প’ষ্ট ডট কম ই পৰ্টেল, কাজিৰঙা লাইভ ই পৰ্টেল আদিৰ আৰু অসমৰ আগশাৰীৰ বাতৰি কাকত সমূহৰ তেজপুৰৰ সমূহ সাংবাদিকৰ লগতে কাজিৰঙা, বোকাখাতৰো সাংবাদিক উপস্থিত থাকি অধ্যাপক ড° লাৰী আজাদৰ সাক্ষাৎ গ্ৰহণ কৰে।
বিশিষ্ট লেখিকা মৃণালী চেতিয়া, সদস্যা তথা কবি সাংবাদিকদ্বয় ক্ৰমে পলিমা চেতিয়া বসুমতাৰী আৰু অজন্তা তালুকদাৰকে আদি কৰি অসমৰ বিভিন্ন স্থানৰ পৰা অহা ভালেসংখ্যক সদস্যা উপস্থিত থাকে। সামৰণি ভাষন আগবঢ়ায় সভাৰ সভাপতি ড° চাৰু চহৰীয়া নাথে আৰু মীনাক্ষী দেৱীয়ে প্ৰতিষ্ঠাপক ড° লাৰী আজাদকে প্ৰমুখ্য কৰি সাংবাদিক সকল তথা উপস্থিত সকলোটিলৈ ধন্যবাদ আৰু কৃতজ্ঞতা জ্ঞাপন কৰি শলাগৰ শৰাই আগবঢ়ায়।
