প্ৰচাৰৰ লাইমলাইটত কাৰ্যত আত্মগোপন বিজেপিৰ লৌহপুৰুষ লালকৃষ্ণ আদৱানী। প্ৰধানমন্ত্ৰী নৰেন্দ্ৰ মোদীয়ে মঙলবাৰে পুৱাতে আদৱানীৰ ঘৰত উপস্থিত হয়। উদ্দেশ্য ৯৫ সংখ্যক জন্মদিনৰ শুভেচ্ছা জনোৱা। ৰঙা গোলাপ ফুলৰ থোপা এটা আগবঢ়ায়। ইয়াৰ পিছত মোদীক আদৱানীৰ কাষত বহি কিছু সময় কথা পাতি থকা দেখা যায়।
আদৱানীৰ আন এজন ঘনিষ্ঠ শিষ্য ৰাজনাথ সিঙো উপস্থিত থাকে। পিছত মোদীয়ে টুইট কৰি কয়, “আদৱাণীজীয়ে ভাৰতৰ উন্নয়নত বহুখিনি অৰিহণা যোগাইছে। দূৰদৰ্শিতা আৰু পাণ্ডিত্যৰ বাবেই তেওঁক সমগ্ৰ দেশতে প্ৰিয়। তেখেতৰ দীৰ্ঘ সুস্থ জীৱন কামনা কৰিলোঁ।”
উল্লেখ্য, এসময়ত বিজেপিত আদৱানীৰ শিষ্য হিচাপে পৰিচিত আছিল মোদী। তেতিয়াৰ প্ৰধানমন্ত্ৰী অটল বিহাৰী বাজপেয়ীয়ে গুজৰাটৰ সংঘৰ্ষৰ সময়ত মুখ্যমন্ত্ৰী হিচাপে ব্যৰ্থ হোৱাৰ বাবে মোদীক ৰাজধৰ্ম চৰ্চা নকৰাৰ অভিযোগ উত্থাপন কৰে। সেই সময়তো তেতিয়াৰ কেন্দ্ৰীয় গৃহমন্ত্ৰী আদৱানীৰ বিৰুদ্ধে মোদীক লুকুৱাই ৰখাৰ অভিযোগ উত্থাপন হৈছিল। কিন্তু ২০১৪ চনৰ লোকসভা নিৰ্বাচনত বিজেপিয়ে মোদীক প্ৰধানমন্ত্ৰী পদৰ প্ৰাৰ্থী হিচাপে ঘোষণা কৰাৰ পিছত দুয়োগৰাকী নেতাৰ মাজত মতানৈক্য ঘটে।
লোকসভাত জয়লাভ কৰাৰ পিছত মোদীয়ে প্ৰশাসন আৰু দল উভয়ৰে বাঘজৰী দখল কৰি আদৱানীৰ দৰে ৭৫ বছৰীয়া নেতাক সক্ৰিয় ৰাজনীতিৰ পৰা কাৰ্যত অৱসৰ লʼবলৈ বাধ্য কৰাইছিল বুলি অভিযোগ উত্থাপন হৈছিল। তেওঁলোকক মাৰ্গদৰ্শন মণ্ডলীৰ সদস্য কৰা হৈছিল। সেই সিদ্ধান্তত আদৱানী সুখী নাছিল। তেওঁ ৰাম মন্দিৰ আন্দোলনৰ নেতা আছিল, ইয়াৰ আধাৰশিলা স্থাপন অনুষ্ঠানলৈও তেওঁক নিমন্ত্ৰণ কৰা হোৱা নাছিল।
