অৰুণাচলত সেনাৰ হেলিকপ্টাৰ দুৰ্ঘটনাগ্ৰস্ত। আজি পুৱা সংঘটিত হয় এই দুৰ্ঘটনাটো। সেনাৰ সূত্ৰ অনুসৰি, দুৰ্ঘটনাগ্ৰস্ত হোৱা হেলিকপ্টাৰখন হৈছে এডভান্সড লাইট হেলিকপ্টাৰ।
প্ৰাপ্ত খবৰ মতে, আপাৰ চিয়াঙৰ মিগিং গাঁৱৰ সমীপত হেলিকপ্টাৰখন দুৰ্ঘটনাগ্ৰস্ত হয়। সংবাদ মাধ্যম এএনআইয়ে সেনাৰ এজন বিষয়াৰ উদ্ধৃতিৰে জনোৱা মতে, হেলিকপ্টাৰখন দুৰ্ঘটনাগ্ৰস্ত হোৱা অঞ্চললৈ কোনো পথ নাই। অতি দূৰ্গম অঞ্চল।
কিন্তু উদ্ধাৰকাৰীয়ে ক্ষিপ্ৰতাৰে উক্ত অঞ্চলত উপনীত হʼবলৈ চেষ্টা কৰিছে। ইতিমধ্যে এটা দল দুৰ্ঘটনাস্থলীলৈ ৰাওনা হৈছে। সেনাৰ সূত্ৰই জনোৱা মতে, হতাহতিৰ সংখ্যা এতিয়াও স্পষ্ট হোৱা নাই। উদ্ধাৰকাৰীয়ে কয় যে যʼত হেলিকপ্টাৰখন দুৰ্ঘটনাগ্ৰস্ত হৈছে তাত উদ্ধাৰকাৰীয়ে কাম সম্পন্ন কৰাটো অতি প্ৰত্যাহ্বানজনক।
আপাৰ চিয়াঙৰ আৰক্ষী অধীক্ষক জুম্মাৰ বাছাৰে কয়, “অতি দুৰ্গম অঞ্চলত হেলিকপ্টাৰখন দুৰ্ঘটনাগ্ৰস্ত হৈছে। দুৰ্গম পাহাৰীয়া পথটো পাৰ হৈ উদ্ধাৰকাৰীয়ে সেই স্থানত উপনীত হʼবলৈ বহু সময় লাগিব। কিন্তু যিমান পাৰি সোনকালে তাত উপনীত হোৱাৰ প্ৰচেষ্টা চলি আছে।”
দুৰ্ঘটনাৰ এটা ভিডিঅ’ শ্বেয়াৰ কৰে কেন্দ্ৰীয় মন্ত্ৰী কিৰেণ ৰিজিজুৱে। ভিডিঅʼটোত ঘন গছ-গছনিৰে আবৃত পাহাৰৰ এটা অংশৰ পৰা কʼলা ধোঁৱা অহা দেখিবলৈ পোৱা গৈছে। এটা টুইটত তেওঁ কয়, “অৰুণাচল প্ৰদেশৰ আপাৰ চিয়াঙত সেনাৰ হেলিকপ্টাৰ দুৰ্ঘটনাগ্ৰস্ত হোৱাৰ ভয়ংকৰ ভিডিঅʼ পাইছো। সকলো ভালে থাকক বুলি প্ৰাৰ্থনা কৰিছো।”
উল্লেখ্য, অৰুণাচলৰ টাৱাঙত ৫ অক্টোবৰত ৰুটিন অনুশীলনৰ সময়ত দুৰ্ঘটনাগ্ৰস্ত হৈছিল সেনাৰ ‘চিতা’ হেলিকপ্টাৰ। সেই দুৰ্ঘটনাত এজন পাইলটৰ মৃত্যু হৈছিল। আহত হৈছিল আন এজন লোক। উক্ত ঘটনাৰ ১৫ দিনৰ পাছত পুনৰ একে ঘটনা ঘটে। কিন্তু এই দুৰ্ঘটনাৰ কাৰণ এতিয়াও স্পষ্ট হোৱা নাই বুলি সেনাৰ সূত্ৰই প্ৰকাশ কৰে।
