ASSAM TIMES POST
নগাঁও : এক হত্যাৰ গোচৰত অভিযুক্ত তিনি অপৰাধীক আজি নগাঁৱৰ অতিৰিক্ত জিলা আৰু সত্ৰ ন্যায়াধীশ(৩ নং) ৰৌশন আৰা ৰহমানৰ আদালতে যাৱজ্জীৱন কৰাদণ্ডৰে দণ্ডিত কৰিছে। গোচৰটোৰ চৰকাৰী জ্যেষ্ঠ অধিবক্তা বিভা ফুকনে জানিবলৈ দিয়া মতে, নগাঁও জিলাৰ চামগুৰি আৰক্ষী থানাৰ অন্তৰ্গত শালনা উৰিয়া বস্তিৰ জগন্নাথ পাত্ৰ,(৩৫) সঞ্জু দেউৰী(২৫) আৰু মেঘনাথ পাত্ৰক(২৬) এক হত্যাৰ গোচৰত অভিযুক্ত কৰি উল্লেখিত আদালতে ভাৰতীয় দণ্ড বিধি আইনৰ ৩০২/৩৪ ধাৰা অনুসৰি দোষী সাব্যস্ত কৰি যাৱজ্জীৱন কাৰাদণ্ড বিহাৰ লগতে প্ৰত্যেককে ১০ হাজাৰ টকাৰ জৰিমনা বিহে। জৰিমনা আদায় দিব নোৱাৰিলে লোক তিনিজনে অতিৰিক্ত ছয় মাহৰ জেল খাটিবলগীয়া হ’ব। উল্লেখ্য যে, বিগত ২০১৮ বৰ্ষৰ ২৬ জানুৱাৰীৰ নিশা অভিযুক্ত লোক তিনিজনে স্থানীয় শালনা জটিয়া পথাৰ গাঁৱৰ মেধাসম্পন্ন উচ্চ শিক্ষিত তথা কাৰ্বিআংলং জিলাৰ এখন ব্যক্তিগত খণ্ডৰ বিদ্যালয়ৰ শিক্ষক কৰ্নেশ্বৰ গঞ্জুক নিৰ্মম ভাবে প্ৰহাৰ কৰি গুৰুতৰ ভাবে আহত কৰিছিল। পিছত সেই বৰ্ষৰ ২ ফেব্ৰুৱাৰীত শিক্ষকজনৰ গুৱাহাটীৰ এখন ব্যক্তিগত চিকিৎসালয়ত চিকিৎসাধীন অৱস্থাত মৃত্যু হৈছিল। লক্ষনীয় বিষয় এই যে ভুক্তভোগী কৰ্নেশ্বৰ গঞ্জুৰ প্ৰেয়সীক অভিযুক্ত সকলৰ ভিতৰত সঞ্জু দেউৰীয়ে প্ৰেমৰ প্ৰস্তাৱ দিয়াত তেওঁ সেই প্ৰস্তাব নাকচ কৰিছিল। যাৰ বাবে ক্ষুব্ধ সঞ্জু দেউৰীয়ে প্ৰেমিক কৰ্নেশ্বৰ গঞ্জুক জগন্নাথ পাত্ৰ আৰু মেঘনাথ পাত্ৰৰ লগত মিলি অতি নিৰ্মম ভাবে প্ৰহাৰ কৰাত তেওঁৰ মৃত্যু ঘটে । তেতিয়াই ঘটনা সন্দৰ্ভত ভুক্তভোগী কৰ্নেশ্বৰৰ শিক্ষক পিতৃ সাতাৱন গঞ্জুয়ে স্থানীয় চামগুৰি আৰক্ষী থানাত এক গোচৰ তৰে। পিছত আৰক্ষীয়ে ঘটনা সন্দৰ্ভত ৫৭/১৮ নম্বৰত গোচৰ ৰুজু কৰে। এই গোচৰৰ ভিত্তিতে তদন্তকাৰী আৰক্ষী বিষয়া বিজু কিংকৰ বসুমতাৰীয়ে অতি ক্ষীপ্ৰতাৰে তদন্ত কৰি সংশ্লিষ্ট আদালতত চাৰ্জ শ্বীট দাখিল কৰে। অতি কম দিনৰ ভিতৰত আৰক্ষী বিষয়া গৰাকীয়ে আদালতত অভিযোগ নামা দাখিল কৰাৰ বাবে দুবছৰ নৌযাঁওতেই অপৰাধীক দোষী সাব্যস্ত কৰি কঠোৰ শাস্তি দিবলৈ সক্ষম হল বুলি মন্তব্য কৰিছে গোচৰটোৰ জ্যেষ্ঠ চৰকাৰী অধিবক্তা বিভা ফুকনে।
