চীনৰ সীমান্তত ঔষধ বিচাৰি নিৰুদ্দেশ হৈছে অৰুণাচলৰ দুজন যুৱক। অঞ্জৱ জিলাৰ ঘটনা এয়া। আৰক্ষীৰ মতে, ১৯ আগষ্টত বটেইলুম টিকৰো আৰু বেইংছো মনু নামৰ দুজন যুৱকে গোইলিয়াঙত থকা ঘৰ এৰি চাগলাম অঞ্চললৈ ৰাওনা হয়। যোৱা ২৪ আগষ্টৰ পৰা এতিয়াও উদ্ধাৰ হোৱা নাই।
বিগত ডেৰ মাহ ধৰি পৰিয়ালৰ লোকে নিজাববীয়াকৈ দুই যুৱকক বিচাৰি ফুৰিছে। অৱশেষত তেওঁলোকে আৰক্ষীৰ কাষ চাপে। অঞ্জৱৰ আৰক্ষী অধীক্ষক ৰিকি কামছিয়ে জনোৱা মতে, প্ৰকৃত নিয়ন্ত্ৰণ ৰেখা অতিক্ৰম কৰাৰ বাবে দুয়োজন লোকক চীনা সেনাই বন্দী কৰাৰ সন্দেহ কৰিছে পৰিয়ালটোৱে।
আৰক্ষী অধীক্ষকগৰাকীয়ে কয়, “আমি নিয়ন্ত্ৰণ ৰেখাৰ ওচৰৰ গাঁৱৰ পৰিয়ালৰ সদস্য আৰু ৰাইজৰ পৰা বিবৃতি সংগ্ৰহ কৰিছো। তাত থকা মানুহবোৰ প্ৰায়ে ফল-মূল, শস্য, খাদ্য, ঔষধ বিচাৰি হাবিত প্ৰৱেশ কৰে। কেইবাদিনো কটায়। মোবাইল নেটৱৰ্ক নাই। গোইলিয়াঙৰ পৰা সেই অঞ্চললৈ খোজ কাঢ়ি যাবলৈ ১০-১২ দিন লাগে।”
চলিত বৰ্ষৰ জানুৱাৰী মাহত অৰুণাচলৰ আপাৰ চিয়াঙৰ বনাঞ্চলত চীনা সেনাই প্ৰকৃত নিয়ন্ত্ৰণ ৰেখাৰ গাতে লাগি থকা এলেকাৰ পৰা মিৰাম টাৰন নামৰ ১৭ বছৰীয়া যুৱক এজনক অপহৰণ কৰিছিল। সেই খবৰটো প্ৰথমতে ভাৰতীয় সেনাক জনোৱা হোৱা নাছিল।
পিছত ভাৰতৰ হেঁচাত পি এল এয়ে মিৰামক ধৰি ৰখাৰ কথা স্বীকাৰ কৰে। ৯ দিনৰ মূৰত মুকলি কৰি দিয়া হয়। উভতি অহাৰ সময়ত মিৰামে কয় যে পি এল এ শিবিৰত লাইটাৰৰ দৰে যন্ত্ৰ এটাৰে তেওঁক কেইবাবাৰো হতচকিত কৰা হৈছিল। হত্যাৰ ভয়ত চকুত পটি বান্ধি থকাৰ সময়তে তেওঁৰ চাৰিওফালে গুলীচালনা কৰা হয়।
লগতে ২০২০ চনত আপাৰ সোৱণশিৰি জিলাৰ নাচো চক্ৰৰ পৰা চীনা সেনাই ৫ জন যুৱকক অপহৰণ কৰিছিল। তেওঁলোকে প্ৰকৃত নিয়ন্ত্ৰণ ৰেখাৰ ওচৰৰ হাবিত খাদ্য সংগ্ৰহ কৰিবলৈ গৈছিল। দীঘলীয়া কূটনৈতিক আলোচনাৰ অন্তত তেওঁলোকে পাঁচজন লোকক কিবিথুলৈ আনি মুকলি কৰি দিয়ে।
