ASSAM TIMES POST
গুৱাহাটীঃ অহা ১৮ নৱেম্বৰৰপৰা অনুষ্ঠিতব্য সংসদৰ শীতকালীন অধিৱেশনত কেন্দ্ৰীয় চৰকাৰে নাগৰিকত্ব (সংশোধনী) বিধেয়ক গৃহীত কৰিলে প্ৰতিবাদৰ হুমকি প্ৰদান কৰিছে অৰুণাচল প্ৰদেশ কংগ্ৰেছ আৰু অৰুণাচল চিভিল ছচাইটিয়ে। বিধেয়কখনক শীঘ্ৰেই খাৰিজ কৰাৰ দাবী জনাই অৰুণাচল প্ৰদেশ কংগ্ৰেছৰ সাধাৰণ সম্পাদক মিনা টক’য়ে সংবাদ মাধ্যমত কয় যে পূৰ্বোত্তৰৰ খিলঞ্জীয়া নাগৰিকৰ স্বাৰ্থৰ বিপৰীতে গৈ কেন্দ্ৰীয় চৰকাৰে ধৰ্মৰ ভিত্তিত বিদেশীক নাগৰিকত্ব প্ৰদান কৰিবলৈ আগবঢ়া কাৰ্যক মানি ল’ব নোৱাৰি। এই বিধেয়কখন গৃহীত হ’লে অৰুণাচলৰ ক্ষুদ্ৰ জনজাতিসমূহ ধ্বংস হৈ যাব। তেওঁ উত্তৰ পূৰ্বাঞ্চলৰ প্ৰতিজন সাংসদ আৰু মুখ্যমন্ত্ৰীসকলক বিধেয়কখনৰ বিৰোধিতা কৰিবলৈ আহ্বান জনায়। ইফালে অৰুণাচল চিভিল ছচাইটিৰ অধ্যক্ষ পাটে টায়ুমে বিধেয়কখনৰ বিৰোধিতা কৰি কয় যে কেনেবাকৈ বিধেয়কখন গৃহীত কৰিলে, অৰুণাচলত গুৰুতৰ প্ৰভাৱ পৰিব। এনে হ’লে ৰাজপথলৈ উলাই অহাৰ বাহিৰে গত্যন্তৰ নাথাকিব বুলি তেওঁ কয়।
