মহাৰাষ্ট্ৰ, মধ্যপ্ৰদেশ, কৰ্ণাটকৰ দৰে দিল্লীতো চৰকাৰ উৎখাত কৰিবলৈ ‘অপাৰেচন লোটাছ’ চলোৱা হৈছে বুলি দাবী আম আদমী পাৰ্টীৰ নেতৃত্বৰ। দিল্লীৰ উপ-মুখ্যমন্ত্ৰী মনীষ ছিছোদিয়াৰ পিছত এইবাৰ আপৰ বিধায়ক সৌৰভ ভৰদ্বাজে দাবী কৰে যে বিজেপি নেতৃত্বই আপৰ বিধায়কসকলক দল ত্যাগ কৰিলে ৫ কোটি টকাৰ ঘোচ দিয়াৰ প্ৰস্তাৱ দিয়ে।
বিজেপিৰ আকৌ অভিযোগ, এতিয়া বিজেপিৰ বিৰুদ্ধে ভুৱা অপপ্ৰচাৰ চলাই নিজক বচাবলৈ চেষ্টা কৰিছে অৰবিন্দ কেজৰিৱালৰ দলটোৱে। কাৰণ আবকাৰী দুৰ্নীতিৰ বাবে বিকল হৈ পৰিছে এই দলটো।
উল্লেখ্য, আবকাৰী দুৰ্নীতিৰ গোচৰৰ সৈতে জড়িত দিল্লীৰ উপ-মুখ্যমন্ত্ৰী মনীষ ছিছোদিয়াৰ বাসগৃহত যোৱা সপ্তাহত চিবিআইয়ে অভিযান চলাইছিল। দিল্লীত আপ চৰকাৰক উৎখাত কৰাৰ লক্ষ্যৰে এই অনুসন্ধান কৰা হৈছে, আৰু বিজেপিয়ে তেওঁক দলৰ পৰা বিচ্ছিন্ন হʼবলৈ প্ৰস্তাৱ দিছে বুলি যুক্তি দি ছিছোদিয়াই ইয়াৰ প্ৰতিক্ৰিয়া ব্যক্ত কৰে। তেনে ক্ষেত্ৰত বিজেপিয়ে তেওঁৰ বিৰুদ্ধে উত্থাপিত সকলো অভিযোগ প্ৰত্যাহাৰ কৰাৰ লগতে দিল্লীৰ মুখ্যমন্ত্ৰী হোৱাৰো প্ৰস্তাৱ দিছিল।
অৱশ্যে ইতিমধ্যে বিজেপিয়ে এই অভিযোগ খাৰিজ কৰিছে। আজি সৌৰভ ভৰদ্বাজে দাবী কৰে, “বিজেপিয়ে কেৱল ছিছোদিয়াই নহয়, অন্য আপৰ বিধায়কক ৫ কোটি টকাৰ বিনিময়ত দলত্যাগ কৰাৰ প্ৰস্তাৱ দিছে। আন ৰাজ্যৰ দৰে ইয়াতো চৰকাৰ উৎখাত কৰিবলৈ ‘অপাৰেচন লোটাছ’ আৰম্ভ কৰিছে বিজেপি নেতাসকলে।” বিজেপিৰ নেতাৰ লগত প্ৰস্তাৱ সংক্ৰান্তত হোৱা কথোপকথনৰ ৰেকৰ্ড তেওঁৰ হাতত আছে বুলি দাবী কৰে সৌৰভে। উপযুক্ত সময়ত জনসাধাৰণৰ মাজলৈ অনা হʼব বুলিও তেওঁ কয়৷
ইফালে আপৰ অভিযোগ অস্বীকাৰ কৰি বিজেপিয়ে দাবী কৰিছে যে কেজৰিৱালৰ দলৰ সকলো মিছলীয়া। আপে নিজৰ দলৰ কাৰোবাক ঘোচ দিবলৈ আহ্বান জনাই বিজেপি নেতাৰ বক্তব্য হিচাপে প্ৰমাণ কৰাৰ কৌশল গ্ৰহণ কৰিছে।
বিজেপিৰ আই টি শাখাৰ মুৰব্বী অমিত মালৱিয়াই কয়, “যদি শেষত কেজৰিৱালে স্বাস্থ্যমন্ত্ৰী সত্যেন্দ্ৰ জৈনক পদ্ম বিভূষণৰ বাবে, শিক্ষামন্ত্ৰী ছিছোদিয়াক ভাৰত ৰত্নৰ বাবে আৰু নিজকে অস্কাৰৰ বাবে মনোনীত কৰি দিয়ে, তেন্তে তেওঁ অনুগ্ৰহ কৰি সোনকালেই নতুন আবকাৰী নীতি কিয় প্ৰত্যাহাৰ কৰা হʼল সেই কথা বুজাই দিবনে? সেই নীতি প্ৰণয়ন কৰিবলৈ আপ নেতাসকলে কিমান টকা খৰচ কৰিছিল? কেজৰিৱালে ইয়াৰ পূৰ্বে জনসাধাৰণক জনাইছিল যে ঘোচ লোৱা আৰু দিয়া নীতি নিৰ্ধাৰণৰ বাবে দিল্লী চৰকাৰ কিমান ক্ষতিগ্ৰস্ত হৈছে।”
