ASSAM TIMES POST
ডিফুঃ বোকাজান মহকুমাৰ বৰলেঙৰীত যোৱা নিশা অস্ত্ৰধাৰী ডকাইতৰ দলৰ ডকাইতি কাণ্ডৰ পিছত তীব্ৰ চাঞ্চল্যৰ সৃষ্টি হৈছে ৷ প্ৰাপ্ত খবৰ অনুসৰি অসম-নগালেণ্ড আন্তঃৰাজ্যিক সীমান্তৰ লাহৰিজানৰ সমীপৰ বৰলেঙৰীত নিশা ৯ঃ৩০ বজাত এটা ৬ জনীয়া অস্ত্ৰধাৰী অচিনাক্ত ডকাইতৰ দলে ২নং বৰলেঙেৰী অঞ্চলৰ নাওৰাজ ছেত্ৰী নামৰ ব্যক্তিজনৰ ঘৰত প্ৰবেশ কৰে।
সেইসময়ত নাওৰাজ ছেত্ৰীৰ ঘৰত কেৱল তেওঁ আৰু তেওঁৰ পত্নীহে আছিল। অস্ত্ৰধাৰী ডকাইতৰ দলটোৱে মাৰণাস্ত্ৰ দেখুৱাই ছেত্ৰীৰ ঘৰৰ পৰা মুঠ ৪ লাখ টকা লুট কৰি নিয়ে। ডকাইতৰ দলটোৱে ছেত্ৰীৰ ঘৰৰ পৰা ধন লুট কৰাৰ পাছতে নাওৰাজ ছেত্ৰীলৈ লক্ষ্য কৰি দুজাঁই কৈ গুলী ফুটাইছিল যদিও কথমপি ছেত্ৰীৰ প্ৰাণ ৰক্ষা পৰে। ইফালে আজি পুৱা বোকাজান মহকুমাৰ মহকুমা আৰক্ষী বিষয়া পদ্ম কুমাৰ পেগু, জিলা আৰক্ষী অধীক্ষক গৌৰৱ উপাধ্যায়, খটখটি আৰক্ষী থানাৰ ভাৰপ্ৰাপ্ত আৰক্ষী বিষয়া মবলিক ব্ৰক্ষ্ম সহ বৃহৎ আৰক্ষীৰ দল ঘটনাস্থলীত উপস্থিত হৈ তদন্ত অব্যাহত ৰাখিছে।
লক্ষণীয় কথা যে আজি কিছু দিনৰ পৰা অসম-নগালেণ্ড সীমান্ত অঞ্চলত অস্ত্ৰধাৰী অচিনাক্ত দুৰ্বৃত্তৰ দলে ধন দাবী, অপহৰণ, হত্যা আদি ঘটনা সংঘটিত কৰি আহিছে। আজিৰ পৰা কেইমাহ মানৰ পূৰ্বে খটখটি অঞ্চলৰ সুৰা সম্ৰাট মূলসিং ৰাথোড়কো এটা অস্ত্ৰধাৰী অচিনাক্ত দুৰ্বৃত্তৰ দলে ব্যৱসায়ীজনৰ ঘৰৰ চোতালতে হত্যা কৰি ঘৰৰ পৰা বহু লক্ষাধিক টকাৰ আ-অলংকাৰ আৰু নগদ ধন লুট কৰি নিছিল।
কালি নিশা ডকাইতি কাণ্ড সংঘটিত কৰা এই অচিনাক্ত অস্ত্ৰধাৰী দলটো ৰাথোড় হত্যাকাণ্ডৰ লগত জড়িত থকাৰ সম্ভাৱনা নুই কৰিব নোৱাৰি। অৱশ্যে দুৰ্বৃত্তৰ দলটো আৰক্ষীৰ জালত পৰিলে সমগ্ৰ ঘটনা পোহৰলৈ আহিব। আনহাতে অসম নাগালেণ্ড সীমান্তত সঘনাই হৈ এনে হিংসাত্মক ঘটনাত সাধাৰণ ৰাইজ উদ্বিগ্ন হৈ পৰিছে ৷
