নগাঁও, ১৫ অক্টোবৰ: মানৱ সমাজক লজ্জানত কৰা এক ঘটনাই জোকাৰি গৈছে নগাঁও জিলা । আজি পুৱাতেই ৰক্তাক্ত হল নগাঁৱৰ ৰাইদঙীয়াৰ মধুপুৰ গাওঁ । কুলাংগাৰ পুত্ৰই লোহাৰৰ ৰদেৰে মৰিয়াই মৰিয়াই মৃতপ্ৰায় কৰিলে নিজ মাতৃ সৰুছোৱালী দাসক। পিতৃ বিনোদ দাসৰ নিৰ্দেশত কুলাংগাৰ পুত্ৰই এনে দুষ্কার্য সংঘটিত কৰা বুলি জানিব পৰা গৈছে । জানিব পৰা মতে সীমা বিবাদক কেন্দ্ৰ কৰি এই কাজিয়াৰ সূত্ৰপাত হয় । পিছত পিতৃ বিনোদ দাসৰ নিৰ্দেশত সৰু পুত্ৰ কৃষ্ণমণি দাস ওৰফে মাতিয়াই লোহাৰ ৰদেৰে মৰিয়াই মৃতপ্ৰায় কৰিলে নিজ মাতৃ সৰুছোৱালী দাসক ।
ঘটনা সংঘটিত কৰি পিতৃ বিনোদ দাস আৰু পুত্ৰই পলায়নৰ কৰে যদিও ৰাইজে পুত্ৰ কৃষ্ণমণিক ধৰি বিদ্যুতৰ খুটাত বান্ধি উত্তম মধ্যম শোধায় ৷ আনহাতে স্হানীয়লোকে সংকটজনক অৱস্থাত আহত সৰুছোৱালী দাসক নগাঁৱলৈ প্ৰেৰণ কৰে । সম্প্ৰতি মহিলাগৰাকীয়ে চিকিৎসালয়ত মৃত্যুৰ সৈতে যুঁজি আছে। ইতিমধ্যে ঘটনাস্থলীত জাজৰি থানাৰ আৰক্ষী উপস্থিত হৈ কুলাংগাৰ পুত্ৰ কৃষ্ণমণি দাসক গ্ৰেপ্তাৰ কৰাৰ লগতে পাষণ্ড স্বামী বিনোদ দাসক বিচাৰি তদন্ত আৰম্ভ কৰিছে। ৰাইজৰ অভিযোগ দীৰ্ঘদিন ধৰি পাৰিবাৰিক কন্দলৰ বাবেই এনে মানৱতা ভূলুণ্ঠিত হোৱা ঘটনা সংঘটিত হয়। এই ঘটনাক কেন্দ্ৰ কৰি সমগ্ৰ ৰাইদঙীয়াত চেপা উত্তেজনাই বিৰাজ কৰিছে ।
