ASSAM TIMES POST
ডিফুঃ জাতিৰ পিতা মহাত্মা গান্ধীৰ ১৫০ বছৰীয়া জন্মজয়ন্তী উপলক্ষে সমগ্ৰ দেশৰ লগত সংগতি ৰাখি পাহাৰীয়া জিলা কাৰ্বি আংলঙতো আজিৰ পৰা জিলা বিজেপিৰ উদ্যোগত গান্ধী সংকল্প যাত্ৰাৰ শুভাৰম্ভ হয়৷
আজি পুৱা ডিফুস্থিত গান্ধী পাৰ্কৰ পৰাই শুভাৰম্ভ হয় গান্ধী সংকল্প যাত্ৰাৰ ৷ কাৰ্বি আংলং স্বায়ত্ত শাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙ, সাংসদ হৰেণছিং বে’ আৰু কাৰ্বি আংলঙ বিজেপিৰ সভাপতি ৰতন টেৰণৰ নেতৃত্বত প্ৰাক্তন বিধায়ক বিদ্যাছিং ইংলেঙ, পৰিষদৰ উপাধ্যক্ষ ৰিতেশ ইংহি ,পৰিষদৰ কেউগৰাকী ইএম, এমএচি, বিজেপি কৰ্মী সকলে মাৰ্জিত সাজ-পোছাক পৰিধান কৰি গান্ধী সংকল্প যাত্ৰাত অংশ গ্ৰহণ কৰা পৰিলক্ষিত হয় ৷
এই সংকল্প যাত্ৰা কাৰবি আংলং, পশ্ছিম কাৰ্বি আংলঙ আৰু ডিমা হাচাওতো সামৰি লোৱা হব৷ আজি লুম্বাজং আৰু ধনশিৰি সমষ্টি গান্ধী সংকল্প পদযাত্ৰাত শতাধিক লোকে অংশ গ্ৰহণ কৰে ৷ এই উপলক্ষে ডিফুৰ বিৰলা আৰু মাঞ্জাৰ মহংদিজুৱাত এখনকৈ সভাও অনুষ্ঠিত হয় ৷ সভাত মুখ্য কাৰ্যবাহী সদস্য তুলিৰাম ৰংহাঙ, কাৰ্বি আংলঙ বিজেপিৰ সভাপতি ৰতন টেৰণ, প্ৰাক্তন বিধায়ক বিদ্যাছিং ইংলেঙ আৰু সাংসদ হৰেণছিং বে’ বহুমূলীয়া ভাষা প্ৰদান কৰি মহাত্মা গান্ধীৰ কৰ্মৰাজীৰ ওপৰত আলোকপাত কৰে৷
সাংসদ হৰেণছিং বে’ই ভাষণ প্ৰসংগত কয় যে, ভাৰত বৰ্ষত বহু ধৰ্মালম্বী লোক থকাৰ পিছতো জাতিৰ পিতা মহাত্মা গান্ধীয়ে ‘অহিংসাই পৰম ধৰ্ম’ক আকোঁৱালি লৈ ৰাম ৰাজ্য প্ৰৱৰ্তন কৰাৰ দৰে জনপ্ৰিয় প্ৰধান মন্ত্ৰী নৰেন্দ্ৰ মোদীয়েও দেশত স্বচ্ছতাৰ জোৱাৰ আনি ‘সবকা সাথ সবকা বিকাশ’ নীতি অৱলম্বন কৰি দেশত আমুল পৰিৱৰ্তন আনিছে৷
আনহাতে গান্ধী সংকল্প যাত্ৰাৰ জৰিয়তে দেশৰ পৰা অপসংস্কৃতি আৰু প্লাষ্টিক ব্যৱহাৰ ৰোধ কৰাৰ বাবে সকলেকে সংকল্পবদ্ধ হোৱাৰ বাবে আহ্বান জনায়৷ আনহাতে তিনি পাৰ্বত্য জিলাৰ পৰা কংগ্ৰেছৰ দুৰ্নীতি নাশ কৰি উন্নয়ণৰ জৰিয়তে পৰিৱৰ্তন আনিবলৈ আজিৰ ‘গান্ধী সংকল্প’ পদযাত্ৰাৰ সংকল্পবদ্ধ বুলি সাংসদ গৰাকীয়ে সংবাদ মাধ্যমক জানিবলৈ দিয়ে৷
