উমৰাংচ’ত জল প্ৰলয়ৰ পৰিস্থিতি অপৰিৱৰ্তিত: সাংসদ হৰেণছিং বে’ৰ ঘটনাস্থলী পৰিদৰ্শন, ড্ৰ’ণ বিমানেৰে পৰিস্থিতি পৰ্যবেক্ষণ

ASSAM TIMES POST

ডিফু: উমৰাংচ’ৰ কপিলী জলবিদ্যুত প্ৰকল্পৰ জলপ্ৰলয়ৰ বিভীষিকা আৰু আতংক আজিও অপৰিৱৰ্তিত হৈয়েই আছে ৷ ইয়াৰ বিপৰীতে ডিমা হাচাও জিলাৰ উমৰাংচ’স্থিত কপিলী জলবিদ্যুত প্ৰকল্পৰ টানেল ভাঙি জল প্ৰলয় সৃষ্টি কৰা আজিলৈকে চাৰিদিন অতিক্ৰম কৰাৰ পিছতো পৰিস্থিতি অৱনতি হৈয়েই আছে ৷

উল্লেখযোগ্য যে, যোৱা যোৱা ৭ অক্টোবৰৰ পুৱতি নিশা জলবিদ্যুত প্ৰকল্পটোৰ এটা টানেল ছিঙি সমগ্ৰ এলেকাত ভয়ঙ্কৰ জলপ্ৰলয় সৃষ্টি হয় ৷

ঘটনা সংঘটিত হোৱা এশঘণ্টা পাৰ হোৱাৰ পিছতো আজিও ৫০/৬০ ফুট উচ্চতা পৰ্যন্ত পানীৰ ফুঁৱৰা উঠিয়েই আছে ৷ ফলত এলেকাটোত জলপ্ৰলয়ে আতংক অব্যাহত ৰখাৰ বিৰুদ্ধে নিপকোৰ জলধাৰৰ গতিৰোধ কৰাত ব্যৰ্থ হৈছে নীপকো কৰ্তৃপক্ষ৷ বান্ধটোৰ প্ৰচণ্ড জলপ্ৰলয়ৰ সময়ৰ পৰা নিৰুদ্ধেশ হৈ থকা কৰ্মচাৰী সকলৰ সন্ধান নোলোৱাত আতংক আৰু আবেগত দিন অতিবাহিত কৰিছে ভুক্তভোগীৰ পৰিয়ালে ৷

জলপ্ৰলয়ত সন্ধানহীন সকলৰ আজি পৰ্যন্ত কোনো অনুসন্ধান চলোৱা হোৱা নাই লগতে এনডিআৰএফেও অভিযান নচলোৱাৰ বাবে ক্ষোভ উজাৰে ৰাইজে ৷ এইসন্দৰ্ভত পানীৰ স্ৰোত সামান্য হলেহে অনুসন্ধান সম্ভৱপৰ হব বুলি নীপকো কৰ্তৃপক্ষৰ পৰা জানিব পৰা গৈছে ৷ ইয়াৰ মাজতে আজি নীপকোৰ এক উচ্চ পৰ্যায়ৰ বিশেষজ্ঞৰ দলে ড্ৰ’ণ বিমাণেৰ বান্ধটোৰ ওপৰৰ পৰা পৰিস্থিতি পৰ্যবেক্ষণ কৰে ৷

বিশেষজ্ঞৰ দলটোৱে ড্ৰ’ণেৰ বান্ধটোৰ তলৰ জলৰ স্ৰুতৰ প্ৰকোপ আৰু এলেকাটোৰ বান পৰিস্থিতি অধ্যয়ণ কৰে ৷ কাইলৈৰ ভিতৰত বান্ধটোৰ পৰিস্থিতি সামান্য হোৱাৰ সম্ভাৱনা আছে বুলি জানিব দিয়ে ৷

প্ৰাণিধান যোগ্য যে ঘটনা সংঘটিত হোৱা দিনৰে পৰা পৰিস্থিতি নিয়ন্ত্ৰণ কৰিবলৈ নীপকোৱে প্ৰচেষ্টা অব্যাহত ৰাখি ব্যৰ্থ হোৱাৰ পিছতো কাইলৈৰ ভিতৰত বান্ধটোৰ পৰিস্থিতি নিয়ন্ত্ৰণাধীন হব বুলি দিয়া আশ্বাসে বিশেষ তাৎপৰ্য বহন কৰিছে ৷

জলপ্ৰলয়ৰ বিভীষিকাৰ মাজতে ধাৰাসাৰে হোৱা বৃষ্টিপাতে পৰিস্থিতিৰ সামান্য হোৱাত সন্দেহ ঘণীভূত হৈ পৰিছে ৷ আনহাতে এলেকাটোত চলি থকা জলপ্ৰলয়ৰ মাজতে তিনি পাৰ্বত্য জিলাৰ একমাত্ৰ সাংসদ হৰেণছিং বে’য়ে আজি ঘটনাস্থলী পৰিদৰ্শন কৰি পৰিস্থিতিৰ বুজ লয় ৷