নিউজ ডেস্কঃ
এনআৰচি সংক্রান্তীয় বায়োমেট্রিক তথ্য সংগ্রহৰ ফলত অসমত ২৭ লক্ষাধিক লোকৰ বায়োমেট্রিক লক হৈ আছে। তেওঁলোকে বেঙ্ক একাউন্ট খুলিব পৰা নাই, পোৱা নাই চৰকাৰী প্রকল্পৰ সুবিধা আৰু সাহায্য। তেওঁলোকক এতিয়া আধাৰ নম্বৰ দিবলৈ প্ৰস্তুতি চলাইছে ৰাজ্য চৰকাৰে। বায়োমেট্রিক লকৰ সমস্যা সমাধান কৰিবলৈ ছুপ্রিম কোর্টৰ দ্বাৰস্থ হৈছে ৰাজ্য চৰকাৰ।
মন্ত্রী পীযূষ হাজৰিকা এই সন্দৰ্ভত জনায়, মুখ্যমন্ত্রীৰ নির্দেশত আছু নেতৃত্বৰ সৈতে সোমবাৰে নিশা বৈঠকত বহে আধাৰ সংক্রান্তীয় সমস্যা নিষ্পত্তিৰ বাবে গঠন হোৱা কমিটিৰ সদস্যসকল। তাত উপস্থিত আছিল মন্ত্রী অতুল বৰা, অজন্তা নেওগ, কেশৱ মহন্ত, যোগেন মহন। বৈঠকত সিদ্ধান্ত হৈছে, যিসকলৰ নাম চূড়ান্ত তালিকাত অহা নাই আৰু যিসকলৰ দাবী-আপত্তিৰ নিষ্পত্তি হোৱা নাই তেনে ব্যক্তিসকলৰ বায়োমেট্রিক লক খুলি দিয়াৰ আবেদন জনাই ছুপ্রিম কোর্টত নতুন শপতনামা জমা দিব ৰাজ্য চৰকাৰে। অৱশ্যে এনআৰচি চূড়ান্ত হোৱাৰ পিছতো যিসকলৰ নাম তালিকাত নুঠিব, তেওঁলোকে আধাৰ কার্ড পালেও এনআৰচিত অন্তর্ভুক্ত হ’ব নোৱাৰিব।
মন্ত্রী পীযূষ হাজৰিকাই লগতে স্পষ্ট কৰি দিয়ে যে আধাৰ কার্ড থকা মানেই নাগৰিকত্ব নিশ্চিত হোৱা নহয়। এনআৰচিত নাম নাথাকিলে তেওঁলোকক নাগৰিক হিচাবে গণ্য কৰা নহ’ব। আনহাতে, বিধানসভাত মুখ্যমন্ত্রী হিমন্তবিশ্ব শর্মাই জনায়, ছুপ্রিম কোর্টৰ এছওপি অনুযায়ী কেৱল তেওঁলোককহে আধাৰ নম্বৰ দিয়া হ’ব যিসকলৰ নাম এনআৰচিৰ চূড়ান্ত তালিকাত উঠিব। কিন্তু আৰজিআইয়ে এতিয়াও আধাৰৰ চূড়ান্ত তালিকা প্রকাশ কৰা নাই।
ৰাজ্যলৈ ‘ৰিজেকচন লেটাৰ’ পঠোৱাৰ কামো আৰম্ভ হোৱা নাই। সেয়ে আধাৰ কার্ডৰ বায়োমেট্রিক লকৰ বিষয়টিও ওলমি আছে। তালিকাচ্যুত ব্যক্তিসকলৰ ভিতৰত বহুতেই প্রকৃত ভাৰতীয় হ’লেও আধাৰ নম্বৰ আৰু সংশ্লিষ্ট সুযোগ-সুবিধা পোৱা নাই। ৰাজ্য চৰকাৰে সমস্যাটি সন্দৰ্ভত কেন্দ্র আৰু আৰজিআইকে একাধিকবাৰ জনাইছে।
মুখ্যমন্ত্রীয়ে দিয়া তথ্য মতে, ৰাজ্যখনত বায়োমেট্রিক তথ্য সংগ্রহ কৰা হৈছিল ২৭,৪৩,৩৯৬ জনৰ। তাৰে ভিতৰত নগাঁও (২,৩৬,৮৯৮) আৰু বৰপেটাত (২,২২,৮৮৩) সর্বাধিক ব্যক্তিৰ বায়োমেট্রিক লক হৈ আছে। লক্ষাধিক মানুহৰ বায়োমেট্রিক লক আছে কাছাৰ, হোজাই, মৰিগাঁও, বাক্সা, বঙাইগাঁও, ধুবুৰী, দৰং জিলাত। অধিকাংশই সংখ্যালঘু অধ্যুষিত এলেকা।
