নিউজ ডেস্কঃ
একমাত্র ভাৰতীয় হিচাবে এতিয়ালৈকে অলিম্পিকৰ ব্যক্তিগত ইভেন্টত সোণ আছিল অভিনৱ বিন্দ্রাৰ নামত। শনিবাৰৰ পৰা এই কৃতিত্বৰ অংশীদাৰ হ’ল নীৰজ চোপ্ৰা। জেভলিনত সোণ জয় কৰি তেওঁ ইতিহাস গঢ়ে।
হাৰিয়ানাৰ ক্রীড়াবিদজনৰ এই কৃতিত্বত সকলোতকৈ বেছি আনন্দিত হৈছে অভিনৱ বিন্দ্রা নিজেই। নীৰজে সোণ জয় কৰাৰ পিছতেই এখন শুভেচ্ছামূলক পত্ৰ লিখে বিন্দ্ৰাই। তাত লিখিছে, “দ্বিতীয় ভাৰতীয় ক্রীড়াবিদ হিচাবে অলিম্পিকত সোণ জয়ৰ বাবে বহুত অভিনন্দন। চাৰি বছৰৰ মূৰত হোৱা বিশ্বৰ সকলোতকৈ বৃহৎ এই ক্ৰীড়া মঞ্চত, য’ত ১১,৭০৭ ক্রীড়াবিদৰ ভিতৰত তিনি শতাংশৰো কমে সোণ জয় কৰে, তাত এই কৃতিত্বৰ সৈতে একোৰে তুলনা নহ’ব।”
বিন্দ্রাই লগতে কয়, “অলিম্পিকত সাফল্যৰ বাবে ক্ষুধার্ত এখন দেশৰ প্রত্যাশাৰ হেঁচা তোমাৰ ওপৰত আছিল, যিটো কাৰণত তোমাৰ কৃতিত্ব আৰু বেছি স্মৰণীয় হৈ থাকিব। জেভলিন হয়তো ভাৰতৰ খুব বেছি মানুহে দেখা নাই, কিন্তু তুমি সেইটোকে সকলোৰে আকর্ষণৰ কেন্দ্রলৈ লৈ আহিলা। লক্ষ লক্ষ মানুহে টিভিত তোমাক দেখিলে।”
বিন্দ্রাৰ মতে, নীৰজৰ এই সাফল্যই ভবিষ্যতে দেশত জেভলিনৰ জনপ্রিয়তা বৃদ্ধিত সহায় কৰিব। তেওঁ লিখিছে, “তুমি প্রথম পৰ্যায় অতিক্রম কৰিছা, এইবাৰ সকলো দুৱাৰ তোমাৰ বাবে খোলা। বহু সৰু সৰু ল’ৰা-ছোৱালীয়ে এইবাৰ তোমাক দেখি জেভলিন শিকিব আৰু দেশক গর্বিত কৰোৱাৰ সপোন দেখুৱাব।”
