নিউজ ডেস্কঃ
কোভিডৰ দ্বিতীয় ঢৌত কার্যত শোচনীয় অৱস্থা সমগ্র বিশ্বৰ। সমগ্র বিশ্বত কৰোনাৰ তৃতীয় ঢৌ বিয়পিব পাৰে যিকোনো মুহূর্ততে। তাৰ মাজতেই আতঙ্ক বার্তা দিলে বিশ্ব স্বাস্থ্য সংস্থাৰ দক্ষিণ-পূব এছিয়াৰ প্রধান ডক্টৰ পুনম ক্ষেত্রপালে। পুনম ক্ষেত্রপালে কয়, ‘এই মুহূর্তত সমগ্ৰ বিশ্বৰ শতাধিক চহৰত বিয়পি পৰিছে কোভিডৰ ডেল্টা প্রজাতি। দিন যিমানেই যাব সিমানে সমগ্ৰ বিশ্বত জোকাৰণি তুলিব কোভিডৰ ডেল্টা প্রজাতিয়ে। বর্তমান দ্রুততাৰে বিয়পিছে কোভিডৰ ডেল্টা প্রজাতি।
এই মুহূর্তত ভাৰত, আমেৰিকা, ব্রিটেইন চিঙ্গাপুৰসহ বিশ্বৰ ১১১খন দেশত পোৱা গৈছে কোভিডৰ ডেল্টা প্রজাতি। কোভিডৰ অন্যান্য প্রজাতিতকৈ সকলোতকৈ ভয়ঙ্কৰ প্রজাতি হ’ল এই ডেল্টা। আৰু কোভিডত সংক্রমণৰ ক্ষেত্রত বেছিভাগেই পোৱা গৈছে ডেল্টা প্রজাতি।’ আমেৰিকাৰ গৱেষক ডক্টৰ এন্টনি ফাউচিয়েও কোভিডৰ ডেল্টা প্রজাতিক লৈ আশঙ্কাৰ কথা শুনাইছে। ফাউচিয়ে কয়, ‘এই মুহূর্তত বিশ্বৰ সকলোতকৈ ভয়ঙ্কৰ কোভিড প্রজাতি হ’ল ডেল্টা। যি দিনে দিনে অধিক ভয়াবহ ৰূপ ধাৰণ কৰিব।’
বিশেষজ্ঞসকলৰ মতে, ভাৰতত কোভিডৰ দ্বিতীয় ঢৌৰ মূল কাৰণ এই ডেল্টা প্রজাতি। যিয়ে ভয়াবহ ৰূপ ধাৰণ কৰে। মহাৰাষ্ট্রৰ পৰা লাহে লাহে এই ডেল্টা প্রজাতি দেশৰ উত্তৰ, মধ্য আৰু পূব দিশত বিয়পি পৰিছে।
