নিউজ ডেস্কঃ
ৰাজস্থানৰ পুৰখাৰাম এখন সৰু চহৰৰ বাসিন্দা৷ তেওঁ গেলামালৰ দোকানী। অৱশ্যে মাহত মাত্র পাঁচ দিনহে তেওঁ দোকান খোলে। কাৰণ বাকী দিনবোৰ তেওঁ শুই থাকে। সকলো মিলাই বছৰত ৩০০ দিন তেওঁ এনেদৰেই কটায়, অৰ্থাৎ টোপনিত।
পিছে কি কাৰণত ইমান টোপনি পুৰখাৰামৰ? চিকিৎসকে কয় তেওঁ ‘এক্সিছ হাইপাৰছমনিয়া’ত আক্রান্ত। ই এনে এক অদ্ভুত সমস্যা, যাৰ ফলত টোপনি ভাঙিবই নোখোজে। দিনৰ পিছত দিন মানুহে শুই কটায়। পুৰখাৰামৰ ক্ষেত্রতো সেয়াই হৈছে। স্থানীয় লোকৰ মাজত ‘কুম্ভকর্ণ’ নামে খ্যাত পুৰখাৰামক টোপনিয়াই থকা অৱস্থাতেই তেওঁৰ পৰিয়ালৰ লোকে গা ধপৱাই দিয়ে, খুৱাই দিয়ে।
কিন্তু পুৰখাৰামৰ দৰে ইমান মাৰাত্মক অৱস্থা নহ’লেও দেশৰ এক অংশৰ মানুহ ‘এক্সিছ হাইপাৰছমনিয়া’ত আক্রান্ত। এই কথা কৈছে ‘নেচনেল চেণ্টাৰ ফৰ বায়োটেকনলজি ইনফৰমেচন’ (এনচিবিআই)-এ। দেশৰ সমগ্র নাগৰিকৰ ভিতৰত প্রায় তিনিৰ পৰা চাৰি শতাংশ এই সমস্যাত ভোগা বুলি প্রতিষ্ঠানটোৰ ৰিপোর্টত প্ৰকাশ।
