পুনৰ বৃহৎ পৰিমাণৰ ড্ৰাগছ উদ্ধাৰ হ’ল দেশত। দিল্লী আৰক্ষীৰ বিশেষ চেলে ৩৫৪ কেজি হেৰইন উদ্ধাৰ কৰিছে, যাৰ বজাৰ মূল্য প্রায় আঢ়ৈ হাজাৰ কোটি টকা। ইয়াৰ সৰবৰাহৰ লগত জড়িত থকাৰ অভিযোগত চাৰিজনক গ্রেপ্তাৰ কৰিছে আৰক্ষীয়ে। তেওঁলোকৰ মাজৰ তিনিজন হাৰিয়ানা আৰু এজন দিল্লীৰ বাসিন্দা।
দিল্লী আৰক্ষীয়ে জনোৱা মতে, সাম্প্রতিক সময়ত দেশত ইমান বৃহৎ পৰিমাণত ড্ৰাগছ বাজেয়াপ্ত হোৱা নাই। এই ঘটনাৰ সৈতে আৰু কোনোবা জড়িত আছে নেকি বা দেশত কোনো ড্ৰাগছ চক্র সক্রিয় হৈ আছে নেকি তাৰ তদন্ত কৰিছে আৰক্ষীয়ে।
শনিবাৰে এক সংবাদমেলত দিল্লী আৰক্ষীৰ স্পেচিয়েল চেলৰ এজন বিষয়া নীৰজ ঠাকুৰে জনাইছে, আফগানিস্তানৰ পৰা উক্ত ড্ৰাগছখিন ভাৰতলৈ আহিছিল। মুম্বাইৰ পৰা দিল্লীলৈ জলপথেৰে সৰবৰাহ কৰা হৈছিল উক্ত ড্ৰাগছ। তেওঁ কয়, ‘‘মধ্যপ্রদেশৰ শিৱপুৰীৰ এটি কাৰখানাত এই ড্ৰাগছখিনি প্রথমে ৰখাৰ পৰিকল্পনা আছিল। তাৰ পিছত সেয়া অন্য স্থানলৈ সৰবৰাহ কৰা হ’লহেঁতেন। তাৰ বাবে ফৰিদাবাদত এটি ঘৰ ভাড়াত লোৱাত হৈছিল।’’ উক্ত ড্ৰাগছ ক্ৰয়ৰ বাবে পাকিস্তানৰ পৰা ধন পঠোৱা হৈছিল বুলিও প্রাথমিকভাৱে আৰক্ষীয়ে জনাইছে।
