নিউজ ডেস্কঃ
ফেচবুকত ধেমালি কৰিবলৈ গৈ মর্মান্তিক পৰিণতি। কেৰালাত মৃত্যু হ’ল এক সদ্যোজাত শিশুৰ। ঘটনাৰ তদন্তত নামি আৰক্ষীৰ চকু কপালত উঠে। কেৱল উক্ত সদ্যোজাতেই নহয়, সমগ্ৰ ঘটনাৰ চিত্রনাট্য লিখিছিল যি দুজনে, তেওঁলোকেও আত্মহত্যা কৰে নদীতে জাঁপ দি। জানিব পৰা মতে, যোৱা জানুৱাৰী মাহত কেৰালাৰ কোল্লাম জিলাৰ কাল্লুভাতুক্কাল গাঁৱত শুকান পাতৰ স্তূপৰ পৰা উদ্ধাৰ হৈছিল উক্ত সদ্যোজাত। হস্পিটেলত ভর্তি কৰোৱা হ’লেও পিছত মৃত্যু হয় শিশুটিৰ।
শিশুটিৰ ডিএনএ নমুনাৰ আঁত ধৰিয়েই তাৰ মাতৃ ৰেছমাৰ ওচৰত উপনীত হয় আৰক্ষী। তেওঁক জেৰা কৰাৰ পিছত জনা যায়, ফেচবুকত এজনৰ সৈতে প্রেমৰ সম্পর্কত জড়িত হৈ পৰিছিল তেওঁ। স্বামীক এৰি উক্ত ব্যক্তিজনৰ সৈতে পলোৱাৰ সিদ্ধান্ত লয় ৰেছমাই। আৰু তাকে কৰিবলৈ গৈয়েই সন্তানক শুকান পাতৰ দ’মত পেলাই থৈ আহিছিল তেওঁ।
তদন্তত আৰক্ষীয়ে আৰু জানিব পাৰে, ৰেছমাৰ ননদ আৰু ভাতৃৰ ছোৱালীয়ে নিজেই ধেমালিৰ ছলেৰে উক্ত ঘটনা ঘটায়। তেওঁলোকেই ফেচবুকত ভুৱা একাউণ্ট খুলি ৰেছমাৰ সৈতে ধেমালি কৰিছিল। আৰক্ষীয়ে এই বিষয়ে তেওঁলোকক মাতি সোধাপোছা কৰাৰ পিছতেই জানিবলৈ পাৰে যে এই ধেমালিৰ কাৰণে ৰেছমাৰ মাত্ৰ কেইদিনমানৰ সন্তানৰ মৃত্যু হৈছে।
তাতোকৈ ডাঙৰ কথা, তাৰ এদিন পিছতে আৰক্ষীৰ ওচৰলৈ খবৰ যায়, নদীত জাঁপ দি আত্মহত্যা কৰে দুয়োজনে। আৰক্ষীয়ে জনায়, ৰেছমাক ন্যায়িক জিম্মালৈ পঠোৱা হৈছিল যদিও কোভিডত আক্রান্ত হোৱাৰ বাবে কোৱাৰেণ্টাইনত আছে।
