নিউজ ডেস্কঃ
এমাহৰো বেছি সময় ধৰি সন্ধানহীন এটা পৰিয়ালৰে ৫ জন। ইফালে–সিফালে বিচাৰ-খোচাৰ কৰি নাই কোনো সন্ধান। মাজে মাজে ছচিয়েল মিডিয়াত সন্ধানহীন এজনৰ পোষ্ট আহে, ‘ভালে আছো, সকলো একেলগে আছো।’ তাতেই সন্দেহ বাঢ়ে আৰক্ষীৰ। সন্দেহজনক লোকক জেৰা কৰি ৮ ফুট গভীৰ গাঁত খন্দা হয়। তাৰ পৰা উদ্ধাৰ হয় ৫ জনৰ মৃতদেহ। ঘটনাটো মধ্যপ্রদেশৰ দিৱাছৰ।
১৩ মে’ৰ পৰা সন্ধানহীন মমতা (৪৫), তেওঁৰ জীয়ৰী ৰূপালী (২১), দিব্যা (১৪) আৰু ৰূপালীৰ খুড়াকৰ দুই ভাই–ভনী। আৰক্ষীয়ে জনোৱা মতে, ৰূপালীৰ সৈতে সম্পর্ক আছিল তেওঁলোকৰ ঘৰৰ মালিক সুৰেন্দ্র ৰাজপুতৰ। সেই সুৰেন্দ্রয়েই ঘটায় এই লোমহৰ্ষক কাণ্ড। সঙ্গী আছিল প্রায় এক ডজন লোক। সুৰেন্দ্র আৰু আন চাৰিজনক আৰক্ষীয়ে গ্রেপ্তাৰ কৰিছে। বাকী সাতজন পলাতক।
মৃতদেহকেইটা কবৰ দিয়াৰ বাবে দ গাঁত খন্দা কামত এই লোক কেইজনৰ সহায় লৈছিল সুৰেন্দ্রই। হত্যাৰ আগৰ পৰাই গাঁত খন্দা আৰম্ভ কৰিছিল। আৰক্ষীয়ে জনাইছে, পাঁচজনৰ বাবে পৃথককৈ পাঁচটা কবৰ খন্দা হৈছিল। কোনোটো মৃতদেহৰ গাতে একো কাপোৰ নাছিল। মৃতদেহত সানি দিয়া হৈছে নিমখ আৰু ইউৰিয়া, যাতে সোনকালে পচি মাটিৰ সৈতে মিহলি হৈ যায়।
ঘটনাৰ বিৱৰণী মতে, সুৰেন্দ্র প্রায়েই ৰূপালীহঁতৰ ঘৰলৈ গৈছিল। তেওঁৰ সৈতে সম্পর্ক থকাৰ পিছতো অন্য এগৰাকীক বিয়া কৰাব ঠিক কৰে সুৰেন্দ্রই। তাতেই খঙৰ কোবত ৰূপালীয়ে ছচিয়েল মিডিয়াত সেই বাগদত্তাৰ ছবি পোষ্ট কৰি ফোন নম্বৰ প্রকাশ কৰি দিয়ে। ইয়াতেই খঙত অগ্নিশৰ্মা হৈ ৰূপালী আৰু তেওঁৰ পৰিয়ালৰ ৫ জনক হত্যা কৰে। হত্যাৰ পিছত ৰূপালীৰ ফোনৰ পৰাই ছচয়েল মিডিয়াত মেছেজ কৰি থাকে। ৰূপালী আন ক’ৰবাত বিয়া হৈছে। তেওঁৰ লগতেই আছে মা-ভগ্নীসকল। আৰক্ষীৰ সন্দেহ হোৱাত ৰূপালীৰ ফোন ট্ৰেক কৰে। তাৰ পিছতে ওলাই পৰে জোলোঙাৰ মেকুৰী।
