নিউজ ডেস্কঃ
কানাডাৰ বহু চহৰত বিগত এসপ্তাহ ধৰি তাপমাত্রা বাঢ়িছে। মঙ্গলবাৰে সেই তাপমাত্রাই পূর্বৰ সকলো ৰেকর্ড ভাঙি দিয়া বুলি জনাইছে কানাডাৰ বতৰ বিজ্ঞান বিভাগে। বিগত এটা সপ্তাহত এদিনৰ মূৰে মূৰে তাপমাত্রা সামান্য বাঢ়িলেও, মঙ্গলবাৰে সেয়া হয় সর্বোচ্চ। বতৰ বিজ্ঞান বিভাগে জনোৱা মতে, মঙ্গলবাৰে কানাডাৰ একাধিক চহৰত তাপমাত্রা প্রায় ৫০ ডিগ্ৰীৰ ওচৰত আছিল। তীব্র গৰমত চাটিফুটি কৰে চহৰবাসী। গ্ৰীষ্ম প্ৰবাহৰ কাৰণে মৃত্যু পর্যন্ত হ’ব পাৰে বুলি আশঙ্কা কৰিছে বতৰ বিজ্ঞান কেন্দ্ৰই।
বিভাগটোৱে জনোৱা মতে, মঙ্গলবাৰৰ তাপমাত্রাই কানাডাত এই পর্যন্ত সর্বোচ্চ। ১৯৭৮ চনত তাপমাত্রাই ৪৭ ডিগ্ৰী স্পৰ্শ কৰিছিল। তাপমাত্রা বাঢ়িলেও এতিয়াৰ দৰে গৰম সেই সময়ত পৰা নাছিল বুলিও জনাইছে। কানাডাৰ লিট্টন ক্লাইমেট ষ্টেচনে জনাইছে,চহৰখনত মঙ্গলবাৰে বিয়লি ৪.২০ বজাত তাপমাত্রা আছিল ৪৯.৫ ডিগ্ৰী। হঠাৎ তাপমাত্রা বৃদ্ধিৰ কাৰণে লিট্টন, ব্রিটিছ কলম্বিয়াত আগতীয়া সতর্কবার্তা জাৰি কৰিছে বতৰ বিজ্ঞান বিভাগে।
কিন্তু হঠাৎ তাপমাত্রা বৃদ্ধিৰ সুনির্দিষ্ট কাৰণ এতিয়াও জনাব পৰা নাই বিশেষজ্ঞসকলে। অৱশ্যে পৰিবেশৰ ভাৰসাম্য আৰু বতৰ পৰিবর্তনৰ কাৰণেই তাপমাত্রা বাঢ়িছে বুলি তেওঁলোকৰ মত।
