স্বাস্থ্য প্ৰতিবেদন:
প্রতিদিনে আতঙ্কৰ মাত্রা বঢ়াই গৈ আছে ক’ৰোনা ভাইৰাছে। দেশ তথা ৰাজ্যজুৰি আক্রান্ত হৈছে হাজাৰ হাজাৰ লোক। প্রতিদিনে বৃদ্ধি পাইছে মৃত্যুও। তাৰ মাজতে সেই ভয় আৰু বৃদ্ধি কৰি উদ্ভৱ হ’ল নতুন এক ৰোগৰ। সাধাৰণ ভাষাত যাক কোৱা হয় কৃষ্ণ ভেকুৰ বা ‘ব্লেক ফাংগাছ’ সংক্রমণ। বিজ্ঞানৰ ভাষাত এই ৰোগৰ নাম মিউকৰ মাইকোচিছ। ইয়াৰ মাজতে ইয়াৰ ভয়ানক সংক্রমণ সম্পর্কে মানুহক সচেতন কৰিবলৈ গাইডলাইন জাৰি কৰিছে আইচিএমআৰে। কোভিডতকৈও এই ভেকুৰৰ আক্রমণত মৃত্যুৰ হাৰ বহু গুণ বেছি।
কেৱল সেয়াই নহয়, ক’ৰোনাত য’ত সংক্রমণৰ পিছত মানুহৰ মৃত্যু হয় এক বা দুই শতাংশ, এই ভেকুৰৰ ক্ষেত্রত সেয়া প্রায় পঞ্চাশ শতাংশৰ ওচৰত। বিজ্ঞানীসকলে জনাইছে, কৰোনাৰ সৈতে যুঁজি যুঁজি এনেই শৰীৰ কাহিল হৈ পৰে, প্রায় ধৰাশায়ী হৈ পৰে হাওঁফাওঁ। ঠিক তেনে সময়তেই শৰীৰত আক্ৰমণ কৰিব পাৰে মিউকৰ মাইকোচিছে। আৰম্ভণিতে ধৰা পৰিলেই ৰোগ যে উপশম হ’ব তেনে নহয়।
সামান্যতম অৱহেলা কৰিলেই হ’ব পাৰে ডাঙৰ বিপদ। কেৱল মৃত্যুৱেই নহয়, আশঙ্কা আছে দৃষ্টিশক্তি হেৰুৱাই পেলোৱাৰো। মহাৰাষ্ট্রত ইতিমধ্যে এই ৰোগত আক্রান্ত হৈ মৃত্যু ঘটিছে আঠজন ৰোগীৰ। গুজৰাটৰ চুৰাটত দৃষ্টিশক্তি হেৰুৱাইছে সাতজনে।
এই বিপদজনক পৰিস্থিতি চম্ভালিবলৈ দেওবাৰেই নিৰ্দেশনা জাৰি কৰিছে আইচিএমআৰে।
কাৰ ক্ষেত্রত আক্রান্ত হোৱাৰ সম্ভাৱনা সকলোতকৈ বেছি?
বিজ্ঞানীসকলৰ মতে, ডাযয়েবেটিছৰ প্রবল সমস্যাত ভোগা মানুহ, চিকিৎসাত ষ্টেৰয়েড ব্যৱহাৰ কৰা ব্যক্তি, বহু দিন ধৰি আইচিচিইউত ভর্তি ৰোগী, সদ্য অঙ্গ প্রতিস্থাপন হোৱা অথবা কেন্সাৰত আক্রান্ত হোৱা অথবা ভৰিকোনাজল থেৰাপি লোৱা ৰোগীসকলৰ ক্ষেত্রত আক্রান্ত হোৱাৰ সম্ভাৱনা প্রবল। বিপদ সৃষ্টি হ’ব পাৰে সদ্য কৰোনাৰ পৰা মুক্তি পোৱা ৰোগীসকলৰ ক্ষেত্রতো। শৰীৰত ষ্টেৰয়েড ব্যৱহাৰৰ কাৰণে এনেই দুর্বল হৈ পৰে ইমিউনিটি, আৰু তাৰ আঁত ধৰিয়েই শৰীৰত বাহ বান্ধে এই ৰোগে।
ৰোগৰ লক্ষণবোৰ :
ক’ৰোনাৰ দৰেই শ্বাস-প্রশ্বাসৰ মাধ্যমেৰেই শৰীৰত প্রবেশ কৰে কৃষ্ণ ভেকুৰ। চিকিৎসকসকলে কয়, চকু বা বা নাকৰ আশপাশে ৰঙা পৰা আৰু বিষ হোৱা, নাক বন্ধ, নাকৰ পৰা বাহিৰ ওলোৱা তৰলৰ ৰং ক’লা বা ৰঙা হৈ যোৱা, জ্বৰ, মূৰৰ বিষ, কাহ, শ্বাসকষ্ট, তেজবমি, মুখৰ এফালে প্রবল বিষ, ফুলি যোৱা, দাঁতৰ বিষ, দাঁত উঠি অহাৰ দৰে সমস্যা, ক্রমশ দৃষ্টিশক্তি কমি অহা, ডাবল ভিজনৰ সমস্যা বা মানসিক সমস্যা সৃষ্টি হোৱা এনে ধৰণৰ উপসর্গ দেখিলেই পৰীক্ষা কৰাওক। কাৰণ অৱহেলা কৰিলে ভৰিব লাগিব পাৰে জীৱনৰ মূল্য।
কেনেদৰে ৰুধিব এই ভেকুৰৰ আক্রমণ :
চিকিৎসকৰ মতে, মাৰাত্মক সংক্রামক হ’লেও সচেতন থাকিলে এই ৰোগ প্রতিৰোধ সম্ভব। যিকোনো ধূলিময় স্থানলৈ গ’লে অৱশ্যেই ব্যৱহাৰ কৰক মাস্ক। মাটি বা বর্জ্যৰ কামৰ সময়ত ব্যৱহাৰ কৰক দীঘল ট্রাউজাৰ আৰু গ্লভছ। হাইপাৰগ্লাইছেমিয়া নিয়ন্ত্রণত ৰখা, ক’ৰোনাৰ পৰা মুক্তিৰ পিছত সর্বদা নজৰ ৰাখক শৰীৰৰ শর্কৰাৰ পৰিমাণৰ ওপৰত। অক্সিজেন কনছেনট্রেটৰত সকলো সময়তে ডিছটিল্ড ৱাটাৰ ব্যৱহাৰ কৰক।
ক’ৰোণাৰ পৰা মুক্তিৰ পিছত বহুতেই কাহিল হৈ পৰিছে কৃষ্ণ ভেকুৰৰ আক্রমণত। সেয়ে আইচিএমআৰৰ পৰামর্শ, উপসর্গ দেখিলে আওকাণ নকৰিব। লগে লগে পৰীক্ষা কৰাওক। সময় মতে ব্যৱস্থা ল’লে সিমান মাৰাত্মক হৈ উঠিব নোৱাৰে এই ৰোগ। কিন্তু অৱহেলা কৰিলে কৃষ্ণ ভেকুৰৰ আক্রমণ হৈ উঠিব পাৰে স্বাভাৱিকতে ভয়ঙ্কৰ।
