[captainform id=”1286858″ lightbox=”1″ miliseconds=”2000″ type=”auto-popup”]
ASSAM TIMES POST
পশ্চিম কাৰ্বি আংলংঃ অসমৰ ৰাজ্যপাল অধ্যাপক জগদীশ মুখীলৈ সোমবাৰে এখন স্মাৰক পত্ৰ প্ৰেৰণ কৰে খেৰণি প্ৰেছ ক্লাব আৰু খেৰণি সাংবাদিক সন্থাই। তিনিটা দাবী সম্বলিত স্মাৰকপত্ৰখনি খেৰণি আৰক্ষী চকীৰ ভাৰপ্ৰাপ্ত বিষয়াৰ জৰিয়তে অসমৰ ৰাজ্যপাললৈ প্ৰেৰণ কৰা হয়। ইয়াত সংগঠন দুটাই উল্লেখ কৰে যে দেশত সাংবাদিক তথা সংবাদ কৰ্মীসকলৰ বিৰুদ্ধে ভাবুকি, নিগ্ৰহ তথা অত্যাচাৰ আদিৰ দৰে ঘৃণনীয়,অমানৱীয়, নিন্দাজনক ঘটনা দিনক দিনে বৃদ্ধি পাইছে।
শেহতীয়াকৈ পশ্চিম কাৰ্বি আংলঙত সংঘটিত হোৱা উপায়ুক্ত আৰু আৰক্ষী থানাৰ ভাৰপ্ৰাপ্ত বিষয়াৰ ছীল-মোহৰ আৰু স্বাক্ষৰ নকল কৰাৰ অভিযোগত প্ৰশাসনে এটা দুষ্ট চক্ৰৰ দুই যুৱকক গ্ৰেপ্তাৰ কৰিবলৈ সক্ষম হোৱাৰ বাতৰি ৰাজ্যৰ বিভিন্ন বাতৰিকাকত, টিভি চেনেলত তথা ডিফু চহৰৰপৰা প্ৰকাশ পোৱা স্থানীয় কাকত,চেনেলত সবিস্তাৰে প্ৰকাশৰ ব্যৱস্থা কৰিছিল খেৰণিৰ সাংবাদিকবৃন্দই।
মন কৰিবলগীয়া কথা যে এই দুষ্টচক্ৰটোৰ কেৱল দুজন যুৱকেহে সকলো কাণ্ড সংঘটিত কৰিছিল তেনে নহয়। তেওঁলোকৰ লগত তথা দুষ্টচক্ৰটোৰ সৈতে আৰু বহুলোক জড়িত হৈ আছে বুলিও ইতিমধ্যে এক গুৰুতৰ অভিযোগ উত্থাপিত হৈছে। উত্থাপিত অভিযোগ মতে, উত্তৰ প্ৰদেশৰ যুৱকক অসমৰ কাৰ্বি আংলঙৰ খেৰণি থানা অঞ্চলৰ স্থানীয় যুৱক সজাই তথা স্থায়ী বাসিন্দা বুলি ভুৱা প্ৰমাণ পত্ৰ প্ৰদান কৰাই প্ৰকৃত স্থানীয় যুৱকসকলক বঞ্চিত কৰি চিআৰপিএফৰ চাকৰিত যোগদান কৰাই আহিছে।
সেয়েহে উক্ত বেআইনী কাৰ্যৰ লগত বহুত যুৱক যে জড়িত থাকিব পাৰে সেয়া আৰক্ষীৰ তদন্তৰ পাছতহে নিশ্চয়কৈ পোহৰলৈ আহিব। উল্লেখযোগ্য যে দুষ্টচক্ৰৰ বিৰুদ্ধে অথবা আৰক্ষীৰ সফলতাৰ উক্ত ঘটনাক লৈ সবিস্তাৰে বাতৰি পৰিবেশন কৰাৰ ফলত খেৰণিৰ সাংবাদিকসকল এতিয়া দুষ্টচক্ৰৰ ষড়যন্ত্ৰৰ বলি হ’ব পাৰে বুলি শংকিত হৈ পৰিছে। সেয়ে পশ্চিম কাৰ্বি আংলঙৰ উপায়ুক্তৰ ছীল-মোহৰ আৰু স্বাক্ষৰৰ লগতে খেৰণি আৰক্ষী থানাৰ ভাৰপ্ৰাপ্ত বিষয়াৰ ছীল-মোহৰ আৰু স্বাক্ষৰ নকল কৰা অপৰাধী সকলৰ বিৰুদ্ধে তদন্ত তীব্রতৰ হ’ব লাগে বুলি সংগঠন দুটাই স্মাৰক পত্ৰখনৰ জৰিয়তে দাবী জনাই যাতে কোনো এজনো দুষ্টচক্ৰৰ সদস্যই কোনো সুৰুঙাৰে সাৰি যাব নোৱাৰে।
দ্বিতীয়তে সংবিধানৰ চতুৰ্থ স্তম্ভ হিচাপে স্থান লাভ কৰা সংবাদ কৰ্মীসকলৰ সুৰক্ষা সুনিশ্চিত কৰিব লাগে। আৰু শেষত অসমৰ যুৱক-যুৱতী সকলক বঞ্চিত কৰি বহিঃৰাজ্যৰ যুৱক-যুৱতীয়ে স্থানীয় ভুৱা প্ৰমাণ পত্ৰ ছপা কৰি কেন্দ্রীয় চৰকাৰৰ অধীনস্থ বিভাগৰ চাকৰি লাভ কৰাৰ অনিয়ম বন্ধ কৰিবলৈ বিহিত ব্যৱস্থা গ্ৰহণৰ অৰ্থে ৰাজ্যপালক আহ্বান জনায়।
উল্লেখ্য স্মাৰক পত্ৰখনিৰ একোখনকৈ প্ৰতিলিপি কাৰ্বি আংলং স্বায়ত্ত শাসিত পৰিষদৰ মুখ্য কার্যবাহী সদস্য তুলিৰাম ৰংহাং, পশ্চিম কাৰ্বি আংলঙৰ উপায়ুক্ত আৰু আৰক্ষী অধীক্ষকলৈও প্ৰেৰণ কৰা হয়।
