নিউজ ডেস্কঃ
বছৰৰ পিছত বছৰ ধৰি একাধিক নাবালিকা-মহিলাক নিজৰ আশ্রমত বন্দী কৰি ধর্ষণ কৰিছিল। আনকি, প্রাপ্তবয়স্ক হ’লেই আশ্রমৰ নাবালিকাই স্বেচ্ছাই থকাৰ কথা ঘোষণা কৰিব লাগিছিল। দিল্লীৰ স্বঘোষিত ধর্মগুৰু বীৰেন্দ্রদেৱ দীক্ষিতৰ বিৰুদ্ধে এনে ধৰণৰ একাধিক অভিযোগ থাকিলেও তেওঁক ধৰিব পৰা নাছিল আৰক্ষীয়ে। এইবাৰ ৭৯ বছৰীয়া উক্ত বৃদ্ধৰ বিৰুদ্ধে ৰেড কৰ্ণাৰ সতর্কতা জাৰি কৰিলে ইন্টাৰপোলে।
আৰক্ষীৰ অনুমান, দেশ এৰি নেপালত আত্মগোপন কৰিছে বীৰেন্দ্রই। উত্তৰ দিল্লীৰ বিজয় বিহাৰ থানাৰ অন্তর্গত ৰোহিণী এলেকাত তেওঁৰ আশ্রম। আধ্যাত্মিক বিশ্ববিদ্যালয় নামৰ দুর্গৰ সমান আশ্রমৰ পৰাই ২০১৭ চনৰ ডিচেম্বৰত উদ্ধাৰ কৰা হৈছিল ৬৭ জনক। তেওঁলোকৰ ভিতৰত বেছিভাগেই নাবালিকা। কেইবাজনো নাবালিকাৰ অভিযোগৰ ভিত্তিত সেই বছৰ বীৰেন্দ্রৰ বিৰুদ্ধে অভিযানত নামে আৰক্ষী। দিল্লী আৰক্ষীৰ সৈতে মহিলা আয়োগৰ সদস্যসকলো উক্ত অভিযানত আছিল।
আশ্রমত তালাচী চলাওঁতে দেখা গৈছিল, সূর্যৰ পোহৰ নোসোমোৱা সৰু সৰু কোঠালিত গৃহবন্দী কৰি ৰখা হৈছিল নাবালিকাবোৰক। আধ্যাত্মিক পথ দেখুওৱাৰ নামত দিনৰ পিছত দিন ধৰি চলিছিল ধর্ষণ-শাৰীৰিক অত্যাচাৰ। আশ্রমত থকা সময়ত নিজৰ পৰিয়ালৰ সৈতে দেখা-সাক্ষাতৰ অনুমতিও নাছিল আবাসিক মহিলাসকলৰ।
