ASSAM TIMES POST
ডিফুঃ অসম ফুটবল সন্থাৰ তত্বাৱধনাত আৰু কাৰ্বি আংলং জিলা ক্ৰীড়া সন্থাৰ ব্যৱস্থাপনাত ডিফু আৰু হানজাংলাংচ’ত চলি থকা ৬৮ সংখ্যক ক্ষিৰোদ বৰুৱা সোঁৱৰণী আন্তঃজিলা ছিনিয়ৰ ফুটবল টুৰ্ণামেণ্টৰ বুধবাৰৰ কোৱাৰ্টাৰ ফাইনেলত ক্ৰমেমৰিগাঁও আৰু গোৱালপাৰাই অগ্ৰগতি লাভ কৰি ছেমিফাইনেলত প্ৰৱেশ কৰিবলৈ সক্ষম হয়।
ডিফুৰ নৱনিৰ্মিত কাছা ষ্টেডিয়ামত চলি থকা কোৱাৰ্টাৰ ফাইনেলত গোৱালপাৰাৰ হাতত অইল ইণ্ডিয়াৰ কেইবাগৰাকী অভিজ্ঞতা সম্পন্ন খেলুৱৈৰে সমৃদ্ধ যোৱা বৰ্ষৰ বিজয়ী ডিব্ৰুগড় ৪-১ গ‘লৰ ব্যৱধানত পৰাস্ত হয়৷ খেলৰ প্ৰথমাৰ্ধত গোৱালপাৰাৰ চিৰঞ্জিত ৰাভাই ৩১ মিনিটত প্ৰথমটো, দ্বিতীয়াৰ্ধৰ ৮০ মিনিটত পংকজ ৰাভাই দ্বিতীয়টো গ‘ল, ৫২ মিনিটত শুক্ৰ ৰাভাই আৰু অতিৰিক্ত তৃতীয় মিনিটত চতুৰ্থটো গ‘ল দি গোৱালপাৰাক মজবুত স্থিতিত উপনীত কৰায়৷
গোৱালপাৰাৰ ৪ গ‘লৰ প্ৰত্যুত্তৰত ডিব্ৰুগড়ৰ হৈ দ্বিতীয়াৰ্ধৰ ৫৮ মিনিটত দীপজ্যোতি দৈমাৰীয়ে একমাত্ৰ গ‘লটো দিয়াৰ বাহিৰে ডিব্ৰুগড়ে গোৱালপাৰাৰ সন্মুখত কোনো প্ৰতিৰোধ গঢ়ি তুলিব নোৱাৰিলে৷ খেলখন পৰিচালনা কৰে পলাশ কোঁৱৰে৷
তেওঁক লাইনত সহায় কৰে দেৱাশিষ মজুমদাৰ আৰু লুকু দাসে৷ চতুৰ্থ ৰেফাৰীৰ দায়িত্বত আছিল পৱিত্ৰ বৰা৷ আনহাতে হানজাংলাংচ‘ খেলপথাৰত চলি থকা আন এখন কোৱাৰ্টাৰ ফাইনেলত মৰিগাঁৱে যোৱাবৰ্ষৰ বিজয়ী দল তিনিচুকীয়াক ১-০ গ‘লৰ ব্যৱধানত পৰাজিত কৰি ছেমিফাইনেলত প্ৰৱেশ কৰে৷ আনহাতে নীতি বহিৰ্ভূত খেলৰ বাবে ক্ৰমে দীপাঙ্কৰ ৰাভা আৰু ডিব্ৰুগড়ৰ বাসুদেৱ বৰুৱাক ৰেফাৰীয়ে হালধীয়া কাৰ্ড প্ৰদৰ্শন কৰে৷
