ASSAM TIMES POST
গুৱাহাটীঃ সদৌ অসম ছাত্ৰ সন্থা আৰু খিলঞ্জীয়া জনজাতি সাহিত্য সভা, অসমৰ মাজত সোমবাৰে গুৱাহাটীৰ শ্বহীদ ভৱনৰ সভাগৃহত এক যৌথ আলোচনা অনুষ্ঠিত হয়। ইয়াত বড়ো সাহিত্য সভা, ৰাভা সাহিত্য সভা, মিচিং সাহিত্য সভা, তিৱা সাহিত্য সভা, দেউৰী সাহিত্য সভা, কাৰ্বি সাহিত্য সভা, ডিমাছা সাহিত্য সভা আৰু গাৰো সাহিত্য সভাৰ সামূহিক মঞ্চ, খিলঞ্জীয়া জনজাতি সাহিত্য সভা, অসমৰ সভাপতি গোবিন্দ টাইড, সম্পাদক প্ৰধান কমলা কান্ত মুছাহাৰী প্ৰমুখ্যে সমূহ সাহিত্য সভাৰ নেতৃবৰ্গই অংশগ্ৰহণ কৰে।
সদৌ অসম ছাত্ৰ সন্থাৰ ফালৰপৰা সভাপতি দীপাংক কুমাৰ নাথ, সাধাৰণ সম্পাদক লুৰীণজ্যোতি গগৈ, মুখ্য উপদেষ্টা ডঃ সমুজ্জ্বল কুমাৰ ভট্টাচাৰ্য প্ৰমুখ্যে বিষয়-ববীয়াসকলে অংশগ্ৰহণ কৰে ইয়াত। যৌথ সভাত ৩১ আগষ্টত প্ৰকাশ পাবলগীয়া অসমৰ ৰাষ্ট্ৰীয় নাগৰিকপঞ্জী আৰু অসমৰ সাম্প্ৰতিক পৰিস্থিতিৰ ওপৰত আলোচনা কৰা হয়।
মঙলবাৰে সংবাদ মাধ্যমলৈ প্ৰেৰণ কৰা খিলঞ্জীয়া জনজাতি সাহিত্য সভা, অসম আৰু সদৌ অসম ছাত্ৰ সন্থাৰ সভাপতিদ্বয়, সম্পাদক প্ৰধান আৰু সাধাৰণ সম্পাদকৰ স্বাক্ষৰযুক্ত এক বিবৃতিত কয়, ‘উচ্চতম ন্যায়ালয়ৰ তদাৰকত চলি থকা প্ৰক্ৰিয়াৰ অন্তত ৩১ আগষ্টৰ প্ৰাকমুহূৰ্তত ৰজাঘৰ, বিভিন্ন ৰাজনৈতিক শক্তি, বিভিন্ন পক্ষৰপৰা জনসাধাৰণৰ মাজত চলাব বিচৰা বিভ্ৰান্তি, ষড়ষন্ত্ৰ বন্ধ কৰিবলৈ যৌথ সভাই সতৰ্ক কৰি দিছে।
বিভিন্ন পক্ষই নিজৰ ভোটবেংক সুৰক্ষিত কৰিবলৈ অবৈধ হিন্দু বাংলাদেশী, অবৈধ মুছলমান বাংলাদেশীক সুৰক্ষিত কৰিবলৈ চলোৱা কাৰ্যকলাপ বন্ধ কৰিবলৈ যৌথ সভাই সতৰ্ক কৰি দিছে।
অবৈধ বাংলাদেশীক উতসাহিত কৰিবপৰা কাম-কাজৰপৰা বিৰত থাকিবলৈ অবৈধ বাংলাদেশীৰ ৰক্ষণাবেক্ষণৰ কামত জড়িতসকলক সভাই সতৰ্ক কৰি দিয়ে।’ যৌথ সভাত অসম চুক্তিৰ অধীনত ৬নং দফা অনুসৰি সাংবিধানিক ৰক্ষাকৱচ প্ৰদান সম্পৰ্কটো বিশদভাৱে আলোচনা কৰি কেতবোৰ সিদ্ধান্ত গ্ৰহণ কৰে।
