নিউজ ডেস্কঃ
বিশ্বৰ সর্বোচ্চ ৰে’লসেতুৰ প্রাথমিক কাম সমাপ্ত। জম্মু-কাশ্মীৰৰ চন্দ্রভাগা নদীৰ ওপৰত এই সেতু নির্মাণৰ কাম ৩ বছৰ ধৰি চলিছিল। অৱশেষত মুখামুখীভাৱে সংযুক্ত হ’বলৈ আগবাঢ়িছে ইস্পাতৰ চিৰিৰ দুয়ো দিশৰ অংশ। বৃহস্পতিবাৰে এই খবৰটো টুইটযোগে জনাইছে ৰে’লমন্ত্রী পীযূষ গোৱেলে। তেওঁ লিখিছে, ‘বিস্ময়ৰ গাঁথনি চলিছে। চন্দ্রভাগা সেতু সংযুক্ত হৈছে। ভাৰতীয় ৰে’লে খুব শীঘ্ৰেই তেওঁলোকৰ বিস্ময়কৰ নির্মাণৰ আৰু এটা মাইলৰ খুঁটি স্পৰ্শ কৰিব ৷’
উল্লেখ্য, বিশ্বৰ সর্বোচ্চ ৰে’লসেতু নিৰ্মাণৰ ভাৰতীয় ৰে’ল মন্ত্ৰালয়ৰ এই প্রকল্পৰ বাজেট ১ হাজাৰ ২৫০ কোটি টকা। উচ্চতা নদীপৃষ্ঠৰ পৰা ৩৫৯ মিটাৰ। অর্থাৎ চন্দ্রভাগা নদীৰ ওপৰত যদি এটা আইফেল টাৱাৰ ভাবি লোৱা হয়, তেতিয়া তাৰো ৩৫ মিটাৰ ওপৰেৰে এই ৰে’লসেতুৰে অহা-যোৱা কৰিব ৰে’ল। পেৰিচৰ আইফেল টাৱাৰৰ উচ্চতা ভূপৃষ্ঠৰ পৰা ৩২৪ মিটাৰ।
সম্প্ৰতি কেৱল ইস্পাতৰ চিৰি জোৰা লগোৱাৰ কামখিনিহে শেষ হোৱাৰ পথত। এতিয়াও বহু কাম বাকী। অৱশ্যে টুইটাৰত ৪৭৬ মিটাৰ দীর্ঘ ইস্পাতৰ চিৰিৰ ছবি দি পীযূষে লিখিছে, ‘বিশ্বৰ সর্বোচ্চ ৰে’লসেতু হৈ উঠাৰ প্রস্তুতি সম্পূর্ণ ৷’
