ASSAM TIMES POST
গুৱাহাটীঃ ‘২০১৭ চনৰ জুলাইত এনআৰচিৰ কামত হস্তক্ষেপ নকৰিবলৈ উচ্চতম ন্যায়ালয়ে ৰাজ্যৰ মুখ্যমন্ত্ৰীক সকীয়নি দিছিল। ইয়াৰ পিছত এনআৰচি উন্নীতকৰণৰ ৰাজ্যিক সমন্বয়ক প্ৰতীক হাজেলাই দুই-এটা সংগঠনৰ পৰামৰ্শ অনুযায়ী, ব্যক্তিগত খেয়াল-খুচিমতে এনআৰচি প্ৰস্তুতকৰণৰ কাম আগবঢ়াই আনিলে।
যাৰ ফলস্বৰূপে আজি আমি বিদেশীৰ নামযুক্ত আৰু ভাৰতীয়ৰ নাম বৰ্হিভূত এনআৰচি এখন পাবলৈ গৈ আছো।’, এই বক্তব্য অসম প্ৰদেশ বিজেপিৰ সভাপতি ৰঞ্জিত কুমাৰ দাসৰ। সোমবাৰে গুৱাহাটীত অনুষ্ঠিত এক সংবাদমেলত তেওঁ এইদৰে কয়।
অহা ৩১ আগষ্টত উন্নীত ৰাষ্ট্ৰীয় নাগৰিকপঞ্জী প্ৰকাশৰ প্ৰাকক্ষণত দাসে পুনৰ কয়, ‘আমি এনআৰচিৰ কাম-কাজ আৰু গতিবিধি দেখি মুঠেও সন্তুষ্ট নহয়।’ সংবাদমেলত দাসে কেন্দ্ৰীয় আৰু ৰাজ্য চৰকাৰক আহ্বান জনাই কয় যে এনআৰচি প্ৰকাশ পোৱাৰ পাছতো সন্দেহযুক্ত ব্যক্তিৰ ক্ষেত্ৰত প্ৰযোজনীয় তদন্ত, অনুসন্ধান কৰাৰ পাছতহে যাতে কাৰ্যকৰী ব্যৱস্থা গ্ৰহণ কৰে। নাম বাদ পৰা ভাৰতীয় নাগৰিকসকলক শংকিত হোৱাৰ পৰিৱৰ্তে আইনৰ ওপৰত আস্থা ৰাখি বিদেশী ন্যায়াধীকৰণৰ কাষ চাপিবলৈ তেওঁ আহ্বান জনায়।
