ষ্টাফ ৰিপ’ৰ্টাৰ
ডিফু : ১৮ জানুৱাৰী ২০২০ৰ পৰা ১৭ ফেব্ৰুৱাৰী ২০২০লৈকে চলিবলগীয়া ৰাষ্ট্ৰজোৰা পথ সুৰক্ষা মাহৰ লগত সংগতি ৰাখি অসম তথা কাৰবি আংলঙতো ৩২ সংখ্যক পথ সুৰক্ষা মাহ পালন কৰা হৈ আছে ৷
“পথ সুৰক্ষাই জীৱন সুৰক্ষা” ৰ থীম হিচাপে লৈ আজি পাহাৰীয়া জিলাৰ সদৰ চহৰ ডিফুৰ বিজেপি কাৰ্যালয়ৰ সন্মূখত পিডব্লিউ ডিফু পথ সংমণ্ডলৰ উদ্যোগত এখনি সজাগতা সভা অনুষ্ঠিত কৰা হয় ৷ সভাত মুখ্য অতিথি হিচাপে কাৰবি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙৰ লগতে সন্মানীয় অতিথি হিচাপে সাংসদ হৰেণছিং বে, জিলা আৰক্ষী অধীক্ষক দেৱজিৎ দেউৰী, প্ৰমুখ্য কৰি কেইবাগৰাকী গণ্যমান্য ব্যক্তি উপস্থিত থাকে ৷
সভাৰ আৰম্ভণিতেই অসম চৰকাৰৰ লোক নিৰ্মান বিভাগৰ মুখ্য অভিযন্তা পবন তেৰাঙ (ইএপি) য়ে আদৰণি ভাষণত পথ দূৰ্ঘটনা সন্দৰ্ভত দেশ তথা ৰাজ্যৰ সামগ্ৰিক পৰিসংখ্যা দাঙি ধৰে ৷ তেওঁ তথ্যত ৰাজ্যৰ পথ দূৰ্ঘটনাৰ উদ্বেগজনক হাৰটো স্পষ্ট হৈ পৰে ৷
তেওঁ জনোৱা অনুসৰি অসমত মুঠ পথৰ দৈৰ্ঘ্য 57,617টা পথ ৷ ইয়াৰে ৰাষ্ট্ৰীয় ঘাই পথত 3900 কিল,মিটাৰ, ৰাজ্যিক ঘাইপথত 3059 কিল’মিটাৰ আৰু মেগা জিলাত , 4360 কিল’মিটাৰ নগৰীয়া পথ 1701 কিল’মিটাৰ আৰু গ্ৰাম্য পথ 44,597 কিল’মিটাৰ পথ আছে ৷
আৰক্ষী, চিআইডি আৰু পিডব্লিউডি বিভাগে আগবঢ়োৱা পৰিসংখ্যা অনুসৰি ৰাষ্ট্ৰীয় ঘাই পথত 2018 ইং, বৰ্ষত 3963 ,2019 ত 3988, টা পথ দূৰ্ঘটনা সংঘটিত হোৱাৰ বিপৰীতে, 2018 বৰ্ষত 1541জন আৰু 2019ত 1619জন লোকৰ মৃত্যু হৈছে ৷
পিডব্লিউডি বিভাগে যুগুতোৱা প্ৰতিবেদন মতে 2018 ইং, বৰ্ষত 2111, 2019ত 2102 টা পথ দূৰ্ঘটনা আৰু 2018ত 681টজন 2019ত 659 জনৰ মৃত্যু হৈছে ৷ সকলো ধৰণৰ পথত 2019ত 1’6% দূৰ্ঘটনা বৃদ্ধি পাইছে ৷ আনহাতে ভাৰতৰ ঘাইপথ মন্ত্ৰালয়ে আগবঢ়োৱা তথ্য অনুসৰি ভাৰতত মুঠ 1,51417জনৰ মৃত্যু হৈছে যিটো সমগ্ৰ বিশ্বৰ 11 শতাংংশ ৷
সমগ্ৰ বিশ্বত মুঠ 2018 বৰ্ষত 13’5 লাখ পথ দূৰ্ঘটনা হৈছে ৷ তাৰ ভিতৰত ভাৰতৰ স্থান প্ৰথম ৷ অসমত মুঠ 2966 টা পথ দূৰ্ঘটনাৰে 2 শতাংশ স্থান অধিকাৰ কৰি আছে ৷ইয়াৰে মাজুলিত সৰ্বনিম্ন 3টা, আৰু শোণিতপুৰ জিলাত সৰ্বোচ্চ 116 টা, আৰু কাৰবি আংলঙত 62 টা আৰু পশ্চিম কাৰবি আংলঙত 13 টা পথ দূৰ্ঘটনা সংঘটিত হৈছে বুলি মুখ্য অভিযন্তা গৰাকীয়ে জানিবলৈ দিছে ৷
মুখ্য অতিথিৰ ভাষণত মুখ্য কাৰ্যবাহী সদস্য তুলিৰাম ৰংহাঙে কয়যে, পথ সমূহ যিমান সুন্দৰকৈ নিৰ্মান কৰা হৈছে দূৰ্ঘটনা সিমানেই বৃদ্ধি পাইছে, সেয়ে সংশ্লিষ্ট বিভাগে পথ সমূহত পৰ্যাপ্ত স্পীড ব্ৰেকাৰ লগাব লাগে বুলি কয় ৷ ইয়াৰোপৰি পথ সুৰক্ষাৰ সজাগতা কাৰ্যসূচী সমূহ সকলো স্তৰতে লৈ যাব লাগে বুলি মন্তব্য কৰে ৷
সাংসদ হৰেণছিং বে’ই নিজৰ ভাষণ প্ৰসংগত কয়যে পথ সমূহৰ অৱস্থা যিমানেই ভাল সিমানেই সচেতনতা হ্ৰাস হোৱাৰ বাবে দূৰ্ঘটনা বৃদ্ধি পাইছে ৷ তেওঁ কাৰবি আংলঙত দূৰ্ঘটনাৰ হাৰ শুণ্য হোৱাৰ কামনা কৰিছে৷ ইয়াৰোপৰি মুখ্য অভিযন্তা পৱন তেৰাঙে সাংবাদিকৰ আগত কয়যে ৰাষ্ট্ৰীয় ঘাই পথ প্ৰাধিকৰণ মন্ত্ৰালয়ে দেশত দূৰ্ঘটনাৰ পৰিমান বৃদ্ধি পোৱাৰ বাবে পথ সুৰক্ষা সপ্তাহৰ পৰিৱৰ্তে মাহযোৰা কাৰ্যসূচীলৈ এইবাৰ পথ সুৰক্ষা মাহ হিচাপে পালন কৰা হৈছে ৷
