ষ্টাফ ৰিপ’ৰ্টাৰ
ডিফু : যোৱা ২ ডিচেম্বৰৰ পৰা ডিফুৰ কাছা খেলপথাৰ আৰু পশ্চিম কাৰবি আংলঙৰ ডংকামোকাম খেলপথাৰত চলি থকা প্ৰথম আন্তঃ এমএচি ফুটবল চেম্পিয়নশ্বীপ ২০২০ৰ শনিবাৰে প্ৰথমখন হাই ভল্টেজ ছেমি ফাইনেল অনুষ্ঠিত হৈ যায় ৷ ডিফুস্থিত কাছাৰ অত্যাধুনিক খেলপথাৰত ফ্লাড লাইটৰ মাজত হোৱা প্ৰথম এম এ চি ফুটবল প্ৰতিযোগিতাৰ দিবা-নৈশৰ তীব্ৰ প্ৰতিদ্বন্ধিতা মূলক খেলখনত দুয়োটা দলে মৰণপণ যুঁজ দিয়ে যদিও বিথুং ফুটবল দলে লাংহিন ফুটবল দলক হেৰুৱাই ফাইনেলত প্ৰৱেশ কৰে ৷
কাৰ্বি আংলং ক্ৰীড়া সন্থা চমুকৈ কাছাৰ উদ্যোগত আৰু কাৰবি আংলং স্বায়ত্তশাসিত পৰিষদৰ সহযোগত অনুষ্ঠিত ৯০ মিনিটৰ সম্পূৰ্ণ খেলখনত উভয়দলে তীব্ৰ প্ৰতিদ্বন্ধিতামূলক আৰু উৎকৃষ্ট খেল প্ৰদৰ্শন কৰি দৰ্শকসকলক আমোদ দিবলৈ সক্ষম হয় ৷ খেলখনৰ প্ৰতিটো মুহূৰ্ততে দুয়োটা দলৰ মাজত প্ৰতিদ্বন্ধিতা তুংগত আছিল ৷
খেলৰ প্ৰথমাৰ্দ্ধত লাংহিনৰ হৈ প্ৰথমাৰ্ধৰ ১২ মিনিটত প্ৰথমটো স্কৰ কৰে কৃষ্ণ হাজোৱাৰীয়ে৷ বিথুং ফুটবল দলৰ হৈ জিতিচন ইংহি প্ৰথমাৰ্দ্ধৰ ৩১ মিনিটত লাংহিন দলক এক গ’ল দি দলৰহৈ সমতা স্থাপন কৰিবলৈ সক্ষম হয় ৷ প্রথমার্ধ ১-১ গ’লত ড্ৰ থাকে ৷ দ্বিতীয়াৰ্দ্ধত বিথুং ফুটবল দলে লাংহিন দলক চাপত ৰাখিবলৈ চেষ্টা কৰে যদিও দলৰহৈ কেইবাজনো খেলুৱৈ কেইবাটাও গ’ল দিয়াত ব্যৰ্থ হয় ৷
ইয়াৰোপৰি দ্বিতীয়াৰ্দ্ধৰ শেহলৈকে খেল ১-১ গলত ড্ৰত সমাপ্ত হয় ৷ ইয়াৰ পিছত খেলৰ অতিৰিক্ত সময়ৰ ২৯ মিনটত বিথুং ফুটবল দলৰহৈ পুণৰ জিতিচন ইংহিয়ে লাংহিনক দ্বিতীয়টো গ’ল দি বিথুঙক ২-১ গ’লৰ ব্যৱধানত বিজয়ী কৰাই ফাইনেলত প্ৰৱেশ কৰায় ৷ স্বাভাৱিকতে উন্নত খেলৰ বাবে বিথুং দলৰ জিতিচন ইংহিক শ্ৰেষ্ঠ খেলুৱৈৰ বঁটা প্ৰদান কৰা হয় ৷ এই বঁটা প্ৰদান কৰে কাৰবি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য তথা কাছাৰ সভাপতি তুলিৰাম ৰংহাঙে ৷ খেলখন পৰিচালনা কৰে আৰৱিনচন কিলিঙে ৷ তেওঁক লাইনত সহায় কৰে বিজয় ৰংহাঙ আৰু ৰূপকণচিং ৰমফাৰে ৷ চতুৰ্থ ৰেফাৰীৰ দায়িত্বত থাকে হনচিং কিলিঙ ৷ সোমবাৰে সন্ধিয়া ৫-৩০ বজাত ডংকামোকাম খেলপথাৰত বৰজান আৰু লুম্বাজঙৰ মাজত দ্বিতীয়খন ছেমিফাইনেল খেল অনুষ্ঠিত হ’ব বুলি জানিব পৰা গৈছে।
