নিউজ ডেক্স:
নৱেম্বৰ মাহৰ শেষৰ দিনটোত সোণৰ মূল্যৰ পতনে বিগত চাৰি বছৰৰ ৰেকর্ড ভাঙিলে। চলিত বছৰটো যেন সকলো দিশৰ পৰাই অন্য ধৰণৰ। এই এটা বছৰৰ ভিতৰতেই সোণৰ মূল্যৰ ৰেকর্ড সংখ্যক বৃদ্ধি আৰু ৰেকর্ড পতন একেলগেই প্ৰত্যক্ষ কৰিলে মাল্টি কমোডিটি এক্সচেঞ্জ বজাৰে।
নৱেম্বৰৰ শেষৰ দিনটোত বিশ্ববজাৰত ‘স্পট গ’ল্ড’ প্রভূত পতনৰ সম্মুখীন হৈছে। এই দিনটোত সোণৰ মূল্য প্রায় ১.২ শতাংশ হাৰত কমিছে। ফলত বিশ্ব বজাৰত প্রতি আউন্স স্পট গ’ল্ডৰ দাম কালি ১৭৬৬.২৬ মার্কিন ডলাৰলৈ নামে।
উল্লেখ্য, নৱেম্বৰ মাহজুৰি সোণৰ দামত ৰেকর্ড ৬ শতাংশ পতন ঘটিছে। বিগত চাৰি বছৰৰ ইতিহাসত যিটো এক নজিৰ স্বৰূপ। ইয়াৰ আগতে কোনো এটা মাহত সোণৰ দামত এনেদৰে পতন ঘটা নাই। যোৱা শুক্রবাৰে সোণৰ দাম ০.৮৫ শতাংশ কমিছিল। ফলত প্রতি ১০ গ্রাম সোণ সিদিনা ৪৮.১০৬ টকাত বিক্ৰী হয়। মঙ্গলবাৰে সোণৰ দামৰ লগতে ৰূপৰ দামতো যথেষ্ট পতন লক্ষ্য কৰা গৈছে।
প্রতি আউন্স ৰূপৰ দাম আজি ৩.২ শতাংশ হাৰত কমিছে। যাৰ ফলত প্রতি আউন্স ৰূপ আজি ২১.৯৬ মার্কিন ডলাৰত বিক্ৰী হৈছে। বিশ্ব বজাৰৰ দৰৰ প্রভাৱ বিভিন্ন চহৰত পৰিছে। কলকাতাৰ বজাৰত ২২ কেৰেট সোণৰ মূল্য উঠিছে ৪৮,৮৩০ টকা। ২৪ কেৰেটৰ দাম ৫১,০৩০ টকা। চেন্নাইত আজি ২২ কেৰেট সোণৰ মূল্য উঠিছে ৪৫,২৪০ টকা, মুম্বাইত ৪৭,২৪০ টকা আৰু দিল্লীত ৪৮,৮৩০ টকা।
