ASSAM TIMES POST
নগাঁওঃ অসমীয়াৰ অস্তিত্ব ৰক্ষাৰ দলিল স্বৰূপ ৰাষ্ট্ৰীয় নাগৰিক পঞ্জী চমুকৈ এন আৰ চি চূড়ান্ত তালিকা প্ৰকাশ পাবলৈ মাজত মাত্ৰ কেইটামান দিন থকা অৱস্থাত এন আৰ চিৰ কেন্দ্ৰ হিচাপে ব্যৱহৃত নগাঁও সদৰ চক্ৰ বিষয়াৰ কাৰ্যালয়ত নিশা সুৰাৰ আড্ডা চলি থকাৰ কথা পোহৰলৈ অহাত চাঞ্চল্যৰ সৃষ্টি হৈছে।
প্ৰাপ্ত খবৰ মতে কালি মাজনিশালৈকে এন আৰ চিৰ কামত নিয়োজিত কেন্দ্ৰটোৰ একাংশ কৰ্মচাৰীয়ে সুৰাপান কৰি কাৰ্যালয়টোত এক হূলস্থূলীয়া পৰিবেশৰ সৃষ্টি কৰে।এনে পৰিস্থিতি প্ৰত্যক্ষ কৰি কাৰ্যালয়টোৰ নিৰাপত্তাৰ দায়িত্বত থকা আৰক্ষীৰ এজন কনিষ্টবলে তেওঁলোকক বাধা প্ৰদান কৰিবলৈ যাওতে তেওঁক ভীতিপ্ৰদৰ্শন কৰাৰ লগতে মাৰপিট কৰিবলৈও উদ্যত হয়।
তেতিয়া তেওঁ সতীৰ্থ নিৰাপত্তাৰক্ষী সকলক খবৰ দিবলৈ যোৱাৰ লগতে শীৰ্ষ আৰক্ষীকো ঘটনা সম্পৰ্কে জনায়। লগে লগে নগাঁও জিলাৰ উপ-আৰক্ষী অধীক্ষক আৰু সদৰ আৰক্ষী থানাৰ ভাৰপ্ৰাপ্ত বিষয়া ঘটনাস্থলীত উপস্থিত হয়। লগতে নগাঁও সদৰ ৰাজহ চক্ৰ বিষয়া পঞ্চমী চৌধুৰীও ঘটনাস্থলীত উপস্থিত হয়। শীৰ্ষ আৰক্ষী বিষয়াৰ দলটোক দেখি সুৰাপান কৰি থকা কৰ্মচাৰীৰ দলটোৱে সেই স্থানৰ পৰা পলায়ন কৰে।
ঘটনা সম্পৰ্কত নগাঁও সদৰ ৰাজহ চক্ৰই বিষয়াই কয় যে ঘটনাটোৰ তদন্ত কৰা হ’ব। কিন্তু সুৰাপানৰ লগত এন আৰ চিৰ কৰ্তব্যত নিয়োজিত কৰ্মচাৰী জড়িত হয় নে নহয়, আমি নিশ্চিত নহয়। হয়তো অন্য কোনো দুস্কৃতিকাৰীয়েহে এই কাৰ্য কৰিব পাৰে। ইয়াৰ বিপৰীতে নিৰাপত্তাৰ দায়িত্বত থকা ব্যক্তিসকলে এন আৰ চিৰ দায়িত্বত নিয়োজিত কৰ্মচাৰীয়েই ঘটনাটোৰ লগত জড়িত থকা বুলি কয়।
লক্ষ্যনীয় কথা যে এন আৰ চিৰ দৰে এটা স্পৰ্শকাতৰ বিষয়ৰ কাৰ্যালয়ত কোনো লোকে সুৰাপান কৰা কাৰ্যই প্ৰতিক্ৰিয়াৰ সৃষ্টি কৰিছে।এই ক্ষেত্ৰত নিৰাপত্তা ব্যৱস্থাটোৰ সোপাঢিলা দিশটোও উন্মোচিত কৰিছে। ইপিনে কাৰ্যালয়টোত এন আৰ চিৰ দায়িত্বত নিয়োজিত কৰ্মচাৰী সকলে তেওঁলোকৰ বিৰুদ্ধে উত্থাপিত অভিযোগ নস্যাৎ কৰিছে।
