ষ্টাফ ৰিপ’ৰ্টাৰ:
ডিফু: যোৱা মাহত কাৰবি আংলং – নাগালেণ্ড সীমান্তৰ লাহৰিজান দুদুকলনিত এক বিধ্বংসী অগ্নিকাণ্ড সংঘটিত হোৱা ঘটনাৰ পিছত উত্তৰ- পূৱ ভাৰতৰ আমিৰে শ্বৰিয়াহ ও নদওৱাতুত তামিৰৰ নাগালেণ্ড ৰাজ্যিক সমিতিৰ উদ্যোগত ও কাৰবি আংলং জিলা সমিতিৰ সহযোগত আজি লাহৰিজানত অগ্নিকাণ্ডত আক্ৰান্ত ছাত্ৰ- ছাত্ৰীৰ মাজত সাহায্য হিছাপে নগদ ধন বিতৰণ কৰা হয় ৷
উল্লেখ্যযে, উক্ত অগ্নিকাণ্ডৰ ফলত প্ৰায় ৫ শতাধিক ঘৰ জ্বলি ভষ্মীভূত হোৱাৰ লগত এটি ফুল কুমলীয়া শিশুৰ জীৱন নাশ হৈছিল ৷ ইয়াৰোপৰি অগ্নিকাণ্ডত সৰ্বস্ব হেৰুৱাইছিল আক্ৰান্ত সকলে ৷ আনহাতে আক্ৰান্ত সকলৰ স্কুলীয়া ছাত্ৰ- ছাত্ৰী সকলৰ জীৱনলৈ নামি আহিছিল ঘোৰ অন্ধকাৰ ৷
ইতিমধ্যে বহু ৰাজনৈতিক আৰু অৰাজনৈতিক সংগঠন সমূহে আক্ৰান্ত সকলৈ বিভিন্ন ধৰণে সাহায্য আগবঢ়াইছে ৷ সেই একে উদ্দেশ্য আগত ৰাখি ও আক্ৰান্ত সকললৈ মানৱীয় দৃষ্টি ভংগীৰে আৰু সহানুভূতি দেখুৱাইছে উত্তৰ – পূৱ ভাৰতৰ আমিৰে শ্বৰিয়াহ ও নদওৱাতুত তামিৰে ৷
আজি নদওৱাতুত তামিৰৰ উদ্যোগত আক্ৰান্ত সকলো ধৰ্মালম্বী ছাত্ৰ-ছাত্ৰী সকলৰ মাজত কিতাপ- পত্ৰ, ইউনিফৰ্ম, ব্যক্তিগত খণ্ডৰ বিদ্যালয় ছাত্ৰ- ছাত্ৰীৰ মাহেকীয়া মাছুল ইত্যাদিৰ বাবে ক্ৰমে, ৫ হাজাৰ, ৪ হাজাৰ, ৩ হাজাৰ আৰু ২ হাজাৰ টকাকৈ প্ৰায় ২ লাখ টকাৰ নগদ ধন বিতৰণ কৰে বুলি উত্তৰ- পূৱ ভাৰতৰ আমিৰে শ্বৰিয়াহ ও নদওৱাতুত তামিৰৰ নাগালেণ্ড ৰাজ্যিক সমিতিৰ প্ৰচাৰ সম্পাদক মওলানা মঃ ইব্ৰাহিমে জানিবলৈ দিছে ৷
আজিৰ উক্ত কাৰ্যসূচীত নদওৱাতুত তামিৰৰ কাৰবি আংলং জিলাৰ কৰ্মী বৃন্দ জোনাব ছুফিয়ান, আব্দুল ছালাম, এনামুদ্দিন, বিশিষ্ঠ সমাজ সেৱক আব্দুল মন্নান, দুদু কলনি টিলা বস্তিৰ ইমাম মওলানা ছফিকুল ইছলাম প্ৰমূখ্য কৰি গণ্য মান্য ব্যক্তি সকল উপস্থিত থাকে ৷
লাহৰিজানত অগ্নিকাণ্ডত আক্ৰান্ত সকলৰ প্ৰতি প্ৰদৰ্শন কৰা সহানুভূতি আৰু অতি তৎপৰতাৰে সাহায্য প্ৰদান কৰাৰ বাবে লগতে যি সকল দল- সংগঠন বা ৰাইজে অগ্নিকাণ্ডত আক্ৰান্ত সকললৈ সহায়ৰ হাত আগবঢ়াইছে তেওঁলোকৰ সকলোকে উত্তৰ- পূৱ ভাৰতৰ আমিৰে শ্বৰিয়াহ মওলানা মঃ ইউছুফ আলী আৰু সাধাৰণ সম্পাদক আতাউৰ ৰহমান মাঝাৰ ভূঁঞাই উচ্চ প্ৰশংসা কৰাৰ লগতে ভূয়সী ঘোষণা কৰিছে বুলি জানিব পৰা গৈছে ৷
