ASSAM TIMES POST
স্পৰ্টছ ডেস্ক : ছেপ্টেম্বৰ-অক্টোবৰত আইপিএল আয়োজনৰ পৰিকল্পনা আছে ভাৰতীয় ক্রিকেট কন্ট্রোল বোর্ডৰ। এই কথা জনাইছে ইন্ডিয়ান প্রিমিয়াৰ লীগৰ গভর্নিং কাউন্সিলৰ অধ্যক্ষ ব্রিজেশ পেটেলে।
উল্লেখ্য যে পূৰ্বে ২৯ মার্চৰ পৰা আইপিএল আৰম্ভ হোৱাৰ কথা আছিল। কিন্তু কৰোনা ভাইৰাছৰ প্ৰকোপত সেয়া অনির্দিষ্টকালৰ বাবে পিছুৱাই দিয়া হয়। আনহাতে, চলিত বছৰত আইপিএল অনুষ্ঠিত নহ’লে বিপুল আর্থিক ক্ষতিৰ আশঙ্কা আছে। সেয়ে আইপিএলৰ আয়োজন কৰিবলৈ ইচ্ছুক বিচিচিআই। এনে অৱস্থাত বোৰ্ডে অপেক্ষা কৰি আছে টি-২০ বিশ্বকাপক লৈ আন্তর্জাতিক ক্রিকেট কাউন্সিলৰ সিদ্ধান্তলৈ। উক্ত সিদ্ধান্ত লোৱা হ’ব জুলাইত। উল্লেখ্য যে এই টি-২০ বিশ্বকাপ অষ্ট্ৰেলিয়াত অহা ১৮ অক্টোবৰৰ পৰা ১৫ নৱেম্বৰলৈ হোৱা কথা। যিটো পিছুৱাই গ’লে আইপিএল অনুষ্ঠিত হোৱাৰ সম্ভাৱনা উজ্জ্বল হৈ উঠিব।
ব্ৰিজেশ পেটেলে কয়, “হয়, আমি ছেপ্টেম্বৰ-অক্টোবৰত আইপিএল আয়োজনৰ কথা ভাবিছো। সেই মতে পৰিকল্পনাও চলিছে। কিন্তু সকলোবোৰ নির্ভৰ কৰিছে বিশ্বকাপৰ ওপৰত। আইচিচিয়ে সিদ্ধান্ত ল’লে আমিও সেই মতে আগবাঢ়িম। সম্প্রচাৰকাৰী কোম্পানী আইপিএলক লৈ খুবেই ইতিবাচক। ক্রিকেটাৰসকলেও খেলিব বিচাৰে। আঢ়ৈ মাহৰ অধিক ঘৰতে বহি আছে তেওঁলোক। এতিয়া আইচিচিয়ে দ্রুতভাৱে সিদ্ধান্ত লোৱাটোহে জৰুৰী।”
আনহাতে, আইপিএল ভাৰততেই অনুষ্ঠিত কৰিব বিচাৰিছে বোৰ্ডে। অৱশ্যে কেন্দ্রীয় চৰকাৰৰ লগত আলোচনামৰ্মেহে চূড়ান্ত সিদ্ধান্ত লোৱা হ’ব। ব্রিজেশ পেটেলে লগতে কয়, “পৰিস্থিতিৰ ওপৰত সকলো নির্ভৰ কৰিছে। কোভিড-১৯ পৰিস্থিতি তেতিয়ালৈ কেনেকুৱা থাকে তাকো আমি চাব লাগিব। তাৰ পিছতেই আইপিএল ক’ত হ’ব সেই সিদ্ধান্ত লোৱা হ’ব। অৱশ্যে ভাৰতেই অগ্রাধিকাৰ পাইছে।”
