ASSAM TIMES POST
— অপূৰ্ব বল্লভ গোস্বামী
বিশিষ্ট পৰিৱেশকৰ্মী, জ্যেষ্ঠ সাংবাদিক
বিশিষ্ট কবি আঁহতগুৰি (শিলনিজানৰ)ৰ পৰিমিতা গোস্বামীৰ সুখপাঠ্য কবিতাপুথি ‘আইৰ বাবেই মই সেউজয়া’ নিঃসন্দেহে সকলোৱে আদৰি ল’ব। কবিতা হৃদয়ৰ ভাষা, হৃদয়ৰ অনুভূতি। ভিন্ন বিষয়বস্তুক ভিন্ন স্বাদেৰে সজাই তুলি গোস্বামীয়ে নিজৰ প্ৰতিভা প্ৰকাশ কৰাতেই সীমাৱদ্ধ হৈ পৰা নাই।
তেখেত যে এগৰাকী স্বভাৱসুলভ কবি এই কথা স্পষ্টকৈ প্ৰকাশ পাইছে। তেখেতৰ মনৰ কথাবোৰত ভাৱৰ ডেউকা মেলি সংবেদনশীল শব্দবোৰে কেতিয়াবা সজোৰে আৰু কেতিয়াবা খুউব সন্তপৰ্ণে ভুমুকি মাৰেহি। সুখ, দুখ, আক্ষেপ, শান্তি, আবেদন, আঘাত, প্ৰতিঘাত ‘আইৰ বাবেই সেউজীয়া’ৰ প্ৰতিটো কবিতাত নিখুঁতভাৱে ফুটি উঠিছে।
মাতৃৰ আশা আকাংক্ষ্যাবোৰ, কাতৰ বুজনিবোৰৰ লগতে জীৱনত মানুহ হিচাপে নিজক প্ৰতিষ্ঠা কৰাৰ বাবে আইৰ আহ্বান আদিক কবিয়ে প্ৰকাশ কৰি শান্তি পাইছে। কদৰ্য পৃথিৱীখনৰ বাবেও বহু আক্ষেপ প্ৰকাশ পাইছে।
পৃথিৱীত কাঠফুলাৰ দৰে গজি উঠা অশুভ শক্তিসমূহৰ বাবে সদা ভীতিগ্ৰস্ততাৰ উমান বৰ সুন্দৰকৈ প্ৰকাশ পাইছে কবিতাবোৰৰ শব্দৰ মাজত৷ বসন্ত ঋতুৰ মাদকতা, বাতৰি কাকতৰ মানুহৰ দৈনন্দিন জীৱনৰ লগত নিবিড় সম্পৰ্কৰ বিষয়েও সুন্দৰ অভিব্যক্তি।
প্ৰেম মানৱ জীৱনৰ এক স্বৰ্গীয় অনুভূতি। এই প্ৰেমৰ আকুল আহ্বান আৰু হৃদয়িক মিলনৰ সুখানুভূতিৰ প্ৰকাশ অতি চমৎকাৰ। মহাপুৰুষ শ্ৰীমন্ত শংকৰদেৱ, ৰূপকোঁৱৰ জ্যোতি প্ৰসাদ আগৰৱালাৰ পৰা সুগন্ধি পখিলাৰ হীৰুদালৈকে সামৰি লৈছে। কবিতা পুথিখনে শব্দৰ শৃংখল গতিত প্ৰাণ পাই উঠিছে।
সংগীত সূৰ্য ড° ভূপেন হাজৰিকাৰ সুৰৰ মূৰ্ছনাকো চিৰ প্ৰবাহমান হোৱাৰ কাতৰ অনুৰোধ কৰিছে শ্ৰোতা জনতাক। সোণালী ধানৰ কঠিয়াৰ পৰা সোণগুটি ভঁড়াললৈ চপাই অনাৰ বৰ্ণনা কবিতাৰ মাধ্যমেৰে বৰ সুন্দৰকৈ প্ৰকাশ কৰিছে। জাতি আৰু সমাজৰ অশুভ সপোনবোৰত উচপ খাই উঠিছে কবি।
সঁচা অৰ্থত কবিতাপুথিখন যথেষ্ট উপভোগ্য হৈছে। শব্দচয়ন মনোৰম। পৰিমিতা গোস্বামীৰ পৰা ভৱিষ্যতে আৰু এনে কবিতা পুথি পাঠক সমাজে নিশ্চয়কৈ আশা কৰিব। তেখেতৰ লিখনিৰে আদৰ পাওঁক। সাহিত্যৰ তেখেতৰ উজ্জ্বল ভৱিষ্যৎ কামনা কৰিলোঁ।
