
সমাজবাদী পাৰ্টীৰ মুৰব্বী অখিলেশ যাদৱৰ (Akhilesh Yadav) ৰোডশ্ব’ত দুৰ্ঘটনা। এই দুৰ্ঘটনাত স্থানীয় বিজেপি নেতাৰ নাবালক পুত্ৰৰ বুলড’জাৰৰ খুন্দাত মৃত্যু হয়। উত্তৰ প্ৰদেশৰ গোৰখপুৰত বুধবাৰে সংঘটিত হয় এই ঘটনা। এই ঘটনাই ৰাজনৈতিক নেতাৰ ৰোডশ্ব’ বা ৰাজহুৱা সভাত ভিৰ নিয়ন্ত্ৰণ আৰু পৰিচালনাক লৈ প্ৰশ্ন উত্থাপন কৰিছে।

আৰক্ষীয়ে জনোৱা মতে, মৃত কিশোৰজনৰ নাম আৰ্যবৰ্ধন সিং। চৌৰীচৌৰাৰ ৰাজধানী গাঁৱৰ বাসিন্দা। তেওঁৰ পিতৃ স্থানীয় বিজেপি নেতা। বুধবাৰে কুণ্ডঘাট অঞ্চলত সমাজবাদী পাৰ্টীয়ে আয়োজন কৰিছিল এক সমদল। মৃত কিশোৰজনৰ পিতৃ অংকৰ সিঙে অভিযোগ কৰে যে পদযাত্ৰাৰ সময়ত ওপৰৰ পৰা ফুল ছটিয়াবলৈ বুলড’জাৰখন তালৈ নিয়া হৈছিল।
অখিলেশৰ কনভয় আগুৱাই যোৱাৰ লগে লগে বুলড’জাৰ চালকজনে গতি বৃদ্ধি কৰে আৰু সেই সময়তে আৰ্যবৰ্ধনক জোৰেৰে খুন্দা মাৰে। তেওঁ পথৰ ডিভাইডাৰত চিটিকি পৰে। তেওঁ মূৰত আঘাতপ্ৰাপ্ত হয়। উদ্ধাৰ কৰি চিকিৎসালয়লৈ নিয়াৰ সময়ত চিকিৎসকে তেওঁক মৃত ঘোষণা কৰে। এই ঘটনাই স্থানীয় ৰাইজৰ মাজত ক্ষোভৰ সৃষ্টি কৰিছে। বুলড’জাৰ চালকজনৰ বিৰুদ্ধে ব্যৱস্থা গ্ৰহণৰ দাবী জনাইছে।
ঘটনাৰ খবৰ পোৱাৰ লগে লগে স্থানীয় বিধায়ক শ্ৰৱণ নিশাদে বিজেপি নেতা আৰু তেওঁৰ পৰিয়ালটোক সাক্ষাৎ কৰি সকলোকে সম্ভৱপৰ সহযোগিতাৰ আশ্বাস দিয়ে। দুৰ্ঘটনাটোক কেন্দ্ৰ কৰি ৰাজনৈতিক উত্তাপ বৃদ্ধি পাবলৈ আৰম্ভ কৰিছে। বিজেপিয়ে এই ঘটনাক সমাজবাদী পাৰ্টীৰ ‘গুণ্ডাগিৰি’ৰ সৈতে তুলনা কৰিছে। সাংবাদিকসকলে অখিলেশক এই দুৰ্ঘটনা সন্দৰ্ভত প্ৰশ্ন কৰে।
সেই সময়ত তেওঁ কয় যে শিশুটিৰ মৃত্যুৰ ঘটনাৰ বিষয়ে তেওঁ একো নাজানে। অৱশ্যে ঘটনা সন্দৰ্ভত প্ৰশাসনৰ ব্যৱস্থাপনাক লৈ প্ৰশ্ন উত্থাপন কৰে। তেওঁলোকৰ বিৰুদ্ধে উত্থাপিত অভিযোগৰ কথা আঙুলিয়াই দি অখিলেশে কয়, “এই ঘটনাৰ বিষয়ে মই একো নাজানো। প্ৰশাসনে বিহিত ব্যৱস্থা গ্ৰহণ কৰাত ব্যৰ্থ হৈছে।” তেওঁ লগতে মন্তব্য কৰে, “বিজেপিৰ কৰ্মী আৰু সমৰ্থকক বিশ্বাস নকৰিব। তেওঁলোকে আপোনাকো ভুৱা গোচৰত ফচাব পাৰে।”









