নিউজ ডেস্কঃ
ভোটাৰ তালিকাৰ বিশেষ নিবিড় সংশোধনৰ অভিযোগ উত্থাপন কৰি মুখ্য নিৰ্বাচন আয়ুক্ত জ্ঞানেশ কুমাৰৰ ভূমিকাক লৈ প্ৰশ্ন উত্থাপন কৰি সোমবাৰে দিল্লীৰ উচ্চতম ন্যায়ালয়ত কংগ্ৰেছকে ধৰি বিৰোধী দলসমূহে প্ৰতিবাদ সাব্যস্ত কৰিবলৈ আহ্বান জনায়। ইয়াৰ পূৰ্বে অধিবক্তাসকলৰ গোচৰৰ শুনানি গ্ৰহণ কৰি দেশৰ মুখ্য ন্যায়াধীশ সূৰ্য কান্তে কয় যে উচ্চতম ন্যায়ালয়ক ৰাজনীতিৰ মাজলৈ টানি অনা উচিত নহয়। অভিযোগ অনুসৰি, দিল্লীত ককৰোচ জনতা পাৰ্টীৰ প্ৰতিবাদৰ সময়ত বহু অধিবক্তাক আৰক্ষীয়ে আটক কৰি ৰাখিছিল।
সোমবাৰে এই বিষয়টোৰ প্ৰতি উচ্চতম ন্যায়ালয়ৰ দৃষ্টি আকৰ্ষণ কৰা হয়। সেই সময়ত মুখ্য ন্যায়াধীশে এই মন্তব্য কৰে। সোমবাৰে উচ্চতম ন্যায়ালয়ত অধিবক্তাসকলৰ বিৰুদ্ধে আৰক্ষীয়ে গ্ৰহণ কৰা কাৰ্যক লৈ উদ্বেগ প্ৰকাশ কৰে জ্যেষ্ঠ অধিবক্তা আত্মাৰাম নাডকাৰ্ণী আৰু উচ্চতম ন্যায়ালয়ৰ উকীল সন্থাৰ সভাপতি প্ৰদীপ ৰায়ে। মুখ্য ন্যায়াধীশৰ নেতৃত্বত তিনিজনীয়া বিচাৰপীঠে মঙলবাৰে এই গোচৰৰ শুনানি গ্ৰহণ কৰিব বুলি জানিবলৈ দিয়ে। বিষয়টোৰ ওপৰত বক্তব্য দি মুখ্য ন্যায়াধীশ সূৰ্য কান্তে কয়, “এই সকলোবোৰ গণতান্ত্ৰিক কাৰ্যকলাপ চলি থাকিব লাগে। কিন্তু উচ্চতম ন্যায়ালয়ৰ কাৰ্যকলাপৰ সন্দৰ্ভত… মই আন্দোলনকাৰীসকলকো অনুৰোধ কৰিছোঁ। উচ্চতম ন্যায়ালয়ক কোনো ধৰণৰ ৰাজনীতিৰ মাজলৈ টানি অনা উচিত নহয়।”
অধিবক্তাসকললৈ মুখ্য ন্যায়াধীশৰ বাৰ্তা, “শান্তিপূৰ্ণভাৱে প্ৰতিবাদ কৰক। কিন্তু অধিবক্তা, আদালতৰ কৰ্মচাৰী আৰু গোচৰৰ সৈতে জড়িতসকলৰ কাৰ্যকলাপত বাধা নিদিব।”
উল্লেখ্য যে সোমবাৰে মুখ্য ন্যায়াধীশক সাক্ষাৎ কৰিব বিচাৰিছিল কংগ্ৰেছ আৰু বিৰোধী মিত্ৰজোঁট ‘ইণ্ডিয়া’ৰ সাংসদসকলে। কিন্তু ৰাহুল গান্ধী আৰু মমতা বেনাৰ্জীৰ অনুৰোধ তেওঁ নাকচ কৰে। তেওঁ কিয় লগ কৰিব নোৱাৰে সৈই বিষয়ে ইমেইলৰ জৰিয়তে তেওঁলোকক জনায়। অৱশ্যে দেশৰ সকলো নাগৰিকৰ বাবে উচ্চতম ন্যায়ালয়ৰ দুৱাৰ মুকলি বুলিও তেওঁ কয়। যিকোনো বিষয়ত যিকোনো ব্যক্তিয়ে আবেদন দাখিল কৰিব পাৰে। আদালতে আইন অনুসৰি সমাধানৰ চেষ্টা কৰিব।
যোৱা ১০ অক্টোবৰ শনিবাৰে চিজেপিয়ে জ্ঞানেশ কুমাৰৰ পদত্যাগ আৰু এছআইআৰ বাতিলৰ দাবীত ৰাজপথলৈ ওলাই আহে। দিল্লী আৰক্ষীয়ে তেওঁলোকৰ প্ৰতিবাদী কাৰ্যসূচীত অনুমতি নিদিলে। এই সমাৱেশ ৰোধ কৰিবলৈ বিভিন্ন পদক্ষেপ গ্ৰহণ কৰা হৈছে। অভিযোগ অনুসৰি, সেই সময়ত আৰক্ষীয়ে কেৱল প্ৰতিবাদ কৰা ছাত্ৰ-ছাত্ৰীকেই নহয়, অধিবক্তা আৰু সাংবাদিককো আটক কৰি ৰাখে। এই সন্দৰ্ভত উচ্চতম ন্যায়ালয়ত গোচৰ ৰুজু কৰা হৈছে। ইয়াৰ উপৰি ৰাহুল গান্ধীয়ে সোমবাৰে বিয়লি উচ্চতম ন্যায়ালয়ৰ দ্বাৰস্থ হ’ব বুলিও জনায়।
